Administrata e presidentit Donald Trump është në bisedime për të zhvendosur potencialisht deri në 1,100 shtetas afganë, të cilët kanë ndihmuar forcat amerikane gjatë luftës në Afganistan, drejt Republikës Demokratike të Kongos.
Sipas raportimeve të The New York Times, kjo nismë vjen pas vendimit për t’i dhënë fund një programi që u lejonte afganëve të përfshirë në operacionet e SHBA-së të aplikonin për zhvendosje në Shtetet e Bashkuara.
Grupi, që aktualisht ndodhet në Katar prej rreth një viti, përfshin përkthyes, bashkëpunëtorë të ushtrisë amerikane dhe familjarë të tyre, mes tyre janë edhe mbi 400 fëmijë.
Më herët, SHBA-të i zhvendosën këta persona në Katar për arsye sigurie, pasi bashkëpunimi i tyre me forcat amerikane i ekspozon ndaj rrezikut në Afganistan, i cili pas tërheqjes së trupave amerikane është rikthyer nën kontrollin e talebanëve.
Sipas të dhënave, rreth 900 prej tyre kualifikohen për zhvendosje në SHBA, ndërsa për rreth 200 të tjerë po shqyrtohen alternativa të tjera, përfshirë vendosjen në shtete të treta, si Republika Demokratike e Kongos, e cila vetë përballet me sfida të sigurisë.
