Sekretari amerikan i Shtetit, Marco Rubio, zhvilloi një takim me Papa Leonin XIV në Vatikan, në një vizitë që vjen pas tensioneve dhe përplasjeve të fundit mes Presidentit amerikan Donald Trump dhe Selisë së Shenjtë.
Takimi zgjati rreth dy orë e gjysmë dhe u zhvillua në Pallatin Apostolik, ndërsa më pas Rubio u takua edhe me Sekretarin e Shtetit të Vatikanit, kardinalin Pietro Parolin.
.jpeg)
Mediat italiane raportojnë se një nga objektivat kryesore të vizitës së Rubios në Romë është përmirësimi i marrëdhënieve me Vatikanin, në një moment kur administrata Trump kërkon të shmangë humbjen e mbështetjes te katolikët amerikanë.
Vizita e kreut të diplomacisë amerikane u shoqërua me masa të forta sigurie në zonën e Vatikanit, ndërsa via della Conciliazione u mbyll për qarkullimin dhe mbi zonë patrulluan edhe helikopterë.
Rubio mbërriti në Vatikan me një autokolonë të shoqëruar nga forca sigurie, ndërsa delegacioni amerikan është akomoduar në një hotel luksoz pranë Via Veneto në Romë, ku sipas raportimeve janë rezervuar 33 dhoma.
Në axhendën e Rubios janë edhe takimet me kryeministren italiane Giorgia Meloni, ministrin e Jashtëm Antonio Tajani dhe ministrin e Mbrojtjes Guido Crosetto.
Ndërkohë, vizita e tij ka nxitur edhe protesta në Romë. Aktivistë dhe përfaqësues të majtë kanë paralajmëruar demonstrata kundër Rubios, duke e akuzuar për mbështetje të politikave amerikane ndaj Izraelit dhe Kubës.
Rubio takohet me Kardinalin Parolin, fokusi i diskutimeve te situata në Lindjen e Mesme dhe marrëdhëniet dypalëshe
Sekretari i Shtetit i SHBA-së, Marco Rubio, u takua sot edhe me Kardinalin Pietro Parolin, Sekretar i Shtetit të Selisë së Shenjtë, për të diskutuar bashkëpunimin e ndërsjellë dhe çështjet urgjente ndërkombëtare.
Sekretari Rubio, deklaroi Departamenti i Shtetit në një deklaratë, përshëndeti mbërritjen e fundit të Kryepeshkopit Gabriele Giordano Caccia si Nunci i ri Apostolik në Shtetet e Bashkuara.
“Diskutimet shqyrtuan përpjekjet e vazhdueshme humanitare në Hemisferën Perëndimore dhe përpjekjet për të arritur paqe të qëndrueshme në Lindjen e Mesme. Takimi theksoi partneritetin e fortë midis Shteteve të Bashkuara dhe Selisë së Shenjtë në promovimin e lirisë fetare”, përfundoi deklarata.
