Ministria e Punëve të Jashtme ka reaguar lidhur me incidentin e dhunshëm ndodhur në Zvërnec një ditë më parë, ku një protestues u dhunua nga policia private e kantierit në këtë zonë.
Ministria e Jashtme shpreh keqardhje për situatën, ndërsa thekson se është në kontakt me autoritetet greke, pasi personi i cili është dhunuar është një shtetas me shtetësi shqiptare dhe greke.
“Lidhur me këtë çështje, autoritetet e të dy vendeve, Shqipërisë dhe Greqisë kanë qenë në kontakt të vazhdueshëm, në nivele të ndryshme. Shqipëria mbetet plotësisht e përkushtuar për forcimin e mëtejshëm të marrëdhënieve me Greqinë, të bazuara në respektin e ndërsjellë, dialogun e hapur dhe vlerat e përbashkëta evropiane”.
Read more:Mjeti përfshihet nga flakët në aksin Korçë-Ersekë, shpëton mrekullisht shoferi, shkrumbohet “Benz”-i
Në reagimin për ngjarjen, Ministria e Jashtme thekson se autoritetet shqiptare kanë marrë të gjitha masat, duke identifikuar dhe arrestuar punonjësin e shoqërisë së sigurisë, përgjegjës për dhunën e ushtruar ndaj një protestuesi me shtetësi shqiptare dhe greke, ndërsa dy punonjës të tjerë janë proceduar penalisht.
“Njëkohësisht, është filluar një hetim disiplinor për të verifikuar rrethanat e ngjarjes dhe përgjegjësitë institucionale përkatëse. Mbrojtja dhe promovimi i të drejtave të njeriut mbeten vlera themelore të demokracisë dhe shtetit të së drejtës në Shqipëri”, thuhet në deklaratë.
Pas protestës, kreu i Policisë së Shtetit, Skënder Hita, njoftoi edhe pezullimin nga detyra të drejtuesit të policisë së Vlorës, për shkak se raportoi gabim duke thënë se një qytetar ishte futur me forcë brenda rrethimit të kantierit.
