Banorët e Qafë Gjashtës, që prej rreth tre muajsh thonë se janë pa ujë, dolën edhe një herë pa përgjigje. Mbledhja e Këshillit Bashkiak të Sarandës, ku pritej të diskutohej pikërisht situata e furnizimit me ujë, dështoi për shkak të mungesës së këshilltarëve të grupit të Partisë Demokratike, ndërsa numri i pamjaftueshëm i anëtarëve të pranishëm bëri që ajo të shtyhej për një datë tjetër.
Pika e parë e rendit të ditës parashikonte një informacion nga Shoqëria Rajonale Ujësjellës Kanalizime Sarandë mbi situatën e furnizimit me ujë, problematikat aktuale dhe masat e marra për garantimin e furnizimit të rregullt të qytetarëve.
Pas shtyrjes së mbledhjes, banorët shprehën pakënaqësinë e tyre, duke thënë se po përballen prej muajsh me mungesën e ujit dhe se nuk po marrin asnjë zgjidhje.
Read more:Makina përplas karrocën me një fëmijë 1 vjeç e gjysmë në Korçë, i mituri dërgohet në spital
“Kemi vajtur tek Ujësjellësi 150 herë. Na përcjellin e na gënjejnë duke thënë ‘do testojmë linjën e re e linjën e vjetër’. Erdhëm këtu tek mbledhja, një grup ikën majtas, një grup djathtas. Tallen me ne. U bë kaq kohë që tallen. Unë kam blerë 450 mijë lekë ujë për një muaj e gjysmë. Ku të ankohemi?”, tha një prej banorëve.
“Kemi 3 muaj pa ujë. Jemi në mjerim. Nuk kërkojmë lëmoshë. Këta nga taksat tona i marrin rrogat. Për 3 muaj marrin makina nga 300 mijë euro. S’kemi ujë. Është turp që në vitin 2026 të blejmë ujë akoma”, u shpreh një tjetër.
“Ne shkojmë çdo dy ditë tek ujësjellësi dhe na përcjellin. Nuk na hapin as telefonin”, thanë banorët njëzëri
“Kryeministri bëri mbledhje mbrëmë dhe tha ‘ç’keni ju, ne na keni në krah’. Po mbase ai nuk i di këto. Nuk ia thonë. E gënjejnë”, tha një tjetër.
