“S’mundem më, kam nevojë për psikolog!”
Kjo është thirrja e dëshpëruar e 34-vjeçares, e cila i rri tek koka e të atit në spitalin e Fierit. Ajo pretendon se është përdhunuar nga një 52-vjeçar, i cili është daja i deputetes socialiste Zegjine Çaushi.
Ngjarja sipas saj ka ndodhur në Maj të këtij viti, ku përmes mashtrimit, ai e ka marrë në shtëpinë e tij për 45 ditë.
“Kam përjetuar gjëra të tmerrshme… Më ka dhunuar, përdhunuar, më ka kërcënuar, nuk mundem më. Dua psikolog!”, tha ajo në kushtet e anonimatit.
Read more:Roskovec/ Plagosi me çekiç ish-vjehrrin, shpallet në kërkim daja i deputetes Zegjine Çaushi
E reja pretendon se gjatë kësaj periudhe ishte tërësisht e pamundur të largohej nga shtëpia e tij për shkak të dhunës dhe kërcënimeve të vazhdueshme.
“Nuk lëvizja dot, s’kisha shanse. Vetëm isha nën kërcënime, në dhunë. Çdo minutë, çdo minutë, më thoshte: ‘Do të vras, do të vras!’. Nuk mundem më, kam nevojë për psikolog, ju lutem!”, shprehet ajo me lot në sy.
Nga shtrati i spitalit, ku gjendet i plagosur në këmbë, i ati i saj, tregon se jeton në kushte të vështira ekonomike me bashkëshorten dhe vajzën, ndërsa 3 djemtë i ka në emigrim. 67-vjeçari rrëfen se i kishte kërkuar 52-vjeçarit punë për vajzën për të përballuar jetesën dhe detyrimet, por ai e rrëmbeu përmes mashtrimit.
Read more:Shpopullimi i fshatrave/ Mbeti vetëm 1 nxënës, i vihet kyçi shkollës së Neviçishtit në Korçë
“Quhet Bledar Bakaj, te cilin e njoha përmes motres sime se kisha nevojë për një vend pune për vajzën. Kishim detyrime ndaj shtetit për çështje toke. Kishim nevojë se jemi të 3 të sëmurë, për pak lekë se nuk e përballojmë dot si familje. Me pensione rrojmë, marrim nga 100.000 lekë të vjetra pension une e gruaja.”
“Na bëri një mashtrim, më pruri te spitali aty poshtë, te poliklinika, për vizitë, se vajza është me anemi e me alergji. Ai na premtoi se kishte njohje dhe do e çonte për kurim në Tiranë, por në fakt e mori në shtëpinë e tij dhe rrugës e ka përdhunuar, në kodrat e Vlorës.”
Pasi ka qëndruar 45 ditë në shtëpinë e tij, e reja ka mundur të rikthehet tek prindërit ku dhe ka bërë denoncim në polici. Prej muajit gusht, kishte marrë edhe urdhër-mbrojtje nga gjykata, por 52-vjeçari e ka thyer këtë urdhër-mbrojtje. Mbrëmjen e 13 shtatorit ka shkuar në shtëpinë e saj me qëllim për ta marrë forcërisht, ku ka hasur në rezistencën e të atit 67-vjeçar, që mbeti i plagosur.
“Erdhi sepse donte të merrte çupën, siç e mori herën e parë. Donte ta merrte për herë të dytë. Në momentin që më goditi me drapër, mua më preku venën dhe doli gjaku… nuk kisha më fuqi. Kishte edhe sëpatë me vete. Ai ra në pus me ujë 5 metra, doli me anë të tubit të pompës. Unë nuk i shkova me qëllim të keq që ta dëmtoja, se isha vetë në gjendje kritike ngaqë më iku gjaku. Erdhi shoqëria përqark aty me ndihmoi. Erdhi edhe policia me shumë vonesë.. Ai doli nga pusi dhe e kapi policia… Ka mundësi të jetë në pus sëpata dhe telefoni i tij”, rrëfen i moshuari.
Pavarësisht kësaj dëshmie, policia shprehet se vajza ka qenë bashkëjetuese e 52-vjeçarit, gjë që kundërshtohet prerazi nga i ati.
Read more:Kushtetuesja tha se arresti i Erion Veliajt ishte jo proporcional, çështja sot në Gjykatën e Lartë
“Është marrë me forcë, jo për bashkëjetesë!”
Aktualisht 52-vjeçari, Bakaj, mbahet në paraburgim dhe pritet të dalë në gjykatën e Fierit për masën e sigurisë. Teksa është marrë në pyetje nga oficerët e policisë gjyqësore, ai ka pretenduar se nuk e ka përdhunuar 34-vjeçaren por ka bashkëjetuar me të.
