Organizata Startup Wise Guys ka hapur zyrtarisht aplikimet për programin “Western Balkan Accelerator”, një iniciativë e re që synon përshpejtimin e startup-eve B2B nga Kosova dhe Maqedonia e Veriut.
Programi 14-ditor do të zhvillohet në format hibrid, duke kombinuar sesione online me aktivitete fizike në Prishtinë dhe Shkup.
Ai përfshin bootcamps, mentorim ndërkombëtar dhe mundësi për investim fillestar deri në 50 mijë euro, me potencial për investime të mëtejshme deri në 250 mijë euro.
Read more (Kosova):Fis Juniku përmbyll sezonin e podcastit dhe paralajmëron: Sezoni i shtatë po vjen
Ky program realizohet me mbështetjen e European Bank for Reconstruction and Development dhe Swiss EP, në bashkëpunim me partnerë lokalë si STIKK, Makerspace Innovation Center Prizren dhe Zephyr Angels.
Programi u dedikohet startup-eve në fazë të hershme që tashmë kanë kaluar fazën e idesë, kanë një produkt minimal funksional (MVP) dhe shenja të para të hyrjes në treg. Fokus i veçantë do t’u jepet sektorëve si SaaS, inteligjenca artificiale, siguria kibernetike, fintech dhe zgjidhjet digjitale B2B.
Sipas organizatorëve, përveç mbështetjes financiare, pjesëmarrësit do të kenë qasje në një rrjet ndërkombëtar mentorësh, investitorësh dhe ekspertësh të industrisë. Programi synon gjithashtu të ndihmojë startup-et në zhvillimin e produktit, strategjitë e shitjes, mbledhjen e kapitalit dhe përgatitjen ligjore.
Read more (Maqedonia e Veriut):Shqiptari e pranon se kishte planifikuar sulmin në koncertin e Taylor Swift në Vjenë
Afati për aplikim është deri më 18 maj, ndërsa startup-et e përzgjedhura do të kenë mundësinë të prezantojnë idetë e tyre para investitorëve dhe të ndërtojnë lidhje të reja në ekosistemin rajonal dhe ndërkombëtar.
Ky program konsiderohet një hap i rëndësishëm për zhvillimin e ekosistemit të startup-eve në Kosovë, duke ofruar më shumë mundësi për rritje dhe ndërkombëtarizim të bizneseve të reja inovative. /Telegrafi/
