Presidenti amerikan Donald Trump ka deklaruar se Irani ka “interes të arrijë një marrëveshje” për t’i dhënë fund konfliktit, por paralajmëroi pasoja të rënda nëse kjo nuk ndodh.
Në një intervistë për transmetuesin francez BFMTV, Trump tha se nuk ishte i sigurt nëse një marrëveshje mund të arrihet së shpejti. “Nuk kam asnjë ide. Nëse nuk e bëjnë, do të kalojnë një kohë shumë të keqe”, u shpreh ai.
Deklaratat vijnë në një moment tensionesh të rritura, ndërsa The New York Times ka raportuar se SHBA-ja dhe Izraeli po përgatiten për skenarë të mundshëm ushtarakë ndaj Iranit, pas armëpushimit të arritur muajin e kaluar.
Read more:Fundi i tensioneve? Merz telefonatë me Trump, Pata një bisedë shumë të mirë me presidentin
Më herët, Trump kishte publikuar edhe një imazh të gjeneruar me inteligjencë artificiale në platformën Truth Social, ku paralajmëronte “qetësinë para stuhisë”.
Nga ana tjetër, ministri i Jashtëm iranian Abbas Araghchi tha se mes Teheranit dhe Uashingtonit ekziston “mosbesim” dhe një “ngërç” në lidhje me çështjen e materialit të pasuruar bërthamor.
Sipas tij, negociatat nuk janë aktualisht në zhvillim, por mund të rishikohen nëse palët tregojnë seriozitet dhe gatishmëri për një marrëveshje të drejtë.
