Sezoni turistik ka nisur në Sarandë me një rritje të ndjeshme të hyrjeve nga porti detar, ku sipas Arben Çipës, kreu i Shoqatës së Hoteleri–Turizmit Sarandë, prurjet e turistëve janë rritur me rreth 15–20% krahasuar me të njëjtën periudhë të vitit të kaluar.
Çipa thekson se edhe kroçerat janë më të pranishme në këtë fillim sezoni, duke sjellë çdo ditë fluks vizitorësh në qytet. Megjithatë, sipas tij, kjo rritje nuk po përkthehet në konsum të lartë në ekonomi lokale, pasi shpenzimet e turistëve mbeten të ulëta.
“Shumica e turistëve që vijnë me kroçera apo në grupe të organizuara janë kryesisht të rinj dhe me qëndrim të shkurtër në qytet, ndaj konsumi në bare, restorante apo shërbime të tjera është i kufizuar,” – shprehet Çipa.
Pavarësisht rritjes së fluksit hyrës, operatorët turistikë vërejnë se rezervimet për 15-ditëshin e parë të muajit qershor nuk janë në nivele të larta, duke krijuar një situatë të kujdesshme për bizneset e sektorit. Sipas tyre, pritshmëritë janë të orientuara drejt kulmit të sezonit në korrik dhe gusht, kur pritet rritje më e fortë e prenotimeve dhe e konsumit në qytetin bregdetar.
