Një ditë pas rrëshqitjes masive të dheut në Kodër Currila, autoritetet kanë shtuar masat e sigurisë në zonën e prekur.
Bashkia e Durrësit ka zgjeruar perimetrin e sigurisë, ndërsa forcat e policisë nuk lejojnë kalimin e qytetarëve, apo futjen e banorëve në apartamentet e tyre për shkak të rrezikut që paraqet terreni i paqëndrueshëm.
Siç raporton korrespondentja e Top Channel Vali qyrfyçi, banorët e pallatit pranë zonës së rrëshqitjes vijojnë të qëndrojnë larg apartamenteve të tyre, ndërsa bizneset që pësuan dëmtime nga masat e dheut dhe pishat kanë pezulluar punën që prej ditës së djeshme.
Gjatë kësaj të shtune pritet mbërritja në terren sërish e specialistëve të Institutit të Ndërtimit dhe Shërbimit Gjeologjik Shqiptar, të cilët do të marrin mostra për të nisur procedurat për studimin e detajuar gjeologjik dhe gjeoteknik të zonës.
Sipas Bashkisë së Durrësit, dy grupe pune të drejtuara nga Instituti i Ndërtimit do të angazhohen paralelisht në terren. Njëri grup do të kryejë vlerësimin paraprak të gjendjes së objektit për të evidentuar dëmtime të mundshme strukturore, ndërsa grupi tjetër do të realizojë matjet dhe analizat që do të shërbejnë për hartimin e akt-ekspertizës dhe projektit të nevojshëm për përforcimin dhe stabilizimin e territorit.
Në të njëjtën kohë, Instituti i Ndërtimit ka ngritur një ekip të posaçëm ekspertësh për të realizuar ekspertizën e plotë të pallatit dhe për të përcaktuar nivelin e sigurisë së tij.
Pasditen e së premtes, u bë e ditur se 25 familjet që banojnë në këtë objekt nuk do të lejohen të rikthehen në apartamentet e tyre deri në përfundimin e vlerësimeve teknike dhe konfirmimin nga institucionet përgjegjëse se ndërtesa është e sigurt për t’u banuar.
Janë evidentuar 25 familje që e përdorin këtë objekt banimi nga 40 apartamente që ka pallati.
