Deputeti i Partisë Demokratike, Belind Këlliçi, ka hedhur akuza të forta ndaj arkitektëve të përfshirë në projektet e lidhura me qeverinë shqiptare dhe dokumentin “Albanian Files”, duke i cilësuar qëndrimet e tyre si të njëanshme politikisht. Sipas Këlliçit, disa arkitektë ndërkombëtarë që kanë punuar në Shqipëri janë “shndërruar në patronazhistë”, duke pretenduar se në shkrimet dhe analizat e tyre mbajnë qëndrime pro qeverisë dhe kritike ndaj opozitës.
Ai ka deklaruar se këto studio arkitekture, përfshirë edhe ato të përmendura prej tij, në disa raste i paraqesin demokratët si “ish-komunistë”, çka sipas tij është e papranueshme dhe e manipuluar.
Këlliçi ka akuzuar gjithashtu se projektet publike në Shqipëri shoqërohen me klientelizëm dhe mungesë transparence, duke pretenduar se fituesit e kontratave janë të lidhur me qeverinë.
“Ne në parlament do të ngremë zërin dhe do të kërkojmë llogari se si janë dhënë këto projekte dhe pse miqtë e kryeministrit rezultojnë gjithmonë fitues”, është shprehur ai. Deputeti demokrat ka kërkuar hetim dhe transparencë të plotë mbi kontratat dhe bashkëpunimet e qeverisë me studio të huaja arkitekture, duke i cilësuar këto marrëdhënie si klienteliste.
REAGIMI
SKANDALOZE! Arkitektët botërorë që u bënë patronazhistë!
Arkitektët e Edi Ramës me të cilët ai ka projektuar ndarjen e plaçkës në Shqipëri, qenkan shndërruar papritur të gjithë në patronazhistë!!!
Ata në shënimet e shkrimet e tyre, pjesë e “Albanian Files”, sulmojnë pareshtur PD dhe thurin lëvdata për PS dhe Kryeministrin Rama. Dhe në nivel lokal madje.
Kjo studio që ka lëshuar rrënjë në Korçë dhe ka bërë atje ç’ka dashur, i cilëson demokratët dhe Partinë Demokratike të Shqipërisë, si forca ish komuniste në Shqipëri! Po po, e pabesueshme por e vërtetë!!! Projektet korruptive apo uria për të fituar para publike në vendin më të varfër të Europës, mesa duket i paska “detyruar” këto studio të shndërrohen ne organizata patronazhimi të PS, duke e manipuluar me qëllim historinë.
Domethënë mjafton që Edi Rama të të japë një projekt dhe befas ai nuk është më i biri i Kristaqit, Anëtar i Presidiumit Popullor e firmëtar i varjes në litar të poetit Havzi Nela në 1988. Nuk ekziston më Kongresi i X i PPSH (qershor 1991) në të cilin forca politike më gjakatare në Europë, e cila izoloi Shqipërinë për 5 dekada, thjeshtë ndërroi emrin në PSSH, që sot njihet si organizatë kriminale, e cila ka në burg me dhjetra e dhjetra zyrtarë, ministra, deputetë, kryetarë bashkie e drejtorë administrate, për korrupsion dhe lidhje me krimin e organizuar.
E pikërisht këto studio, paratë që fitojnë në Shqipëri i marin nga zyrtarët e ish Partisë së Punës, mesa duket bashkë me sloganin e devizën e gatshme se “fajin e ka Saliu” apo “opozita është problemi”!
Të kalosh nga shijet personale, në shpifje publike, e ta kesh kurajon ta shkruash këtë në një libër, është shumë e papranueshme! Aq më tepër për një studio gjasme ndërkombëtare arkitekture si Bolles and Wilson.
Këto qëndrime nuk janë të rastësishme!
Më herët, arkitekti holandez de Graaf kërkonte që në Shqipëri të mos mbaheshin zgjedhje fare, të shpallej mbret ose president i përjetshëm, punëdhënësi i tij Edi Rama.
Këto janë të gjitha lobime të paguara mirë nga taksat e shqiptarëve, e popullit më të varfër e të vjedhur të Europës.
Këto kontrata e këto klientelizma të Edi Ramës meritojnë një transparencë dhe hetim të plotë.
Ne në parlament do të ngremë zërin e do të kërkojmë llogari. Si i kanë marrë këto punë, si janë afruar, dhe pse miqtë e Edi Ramës janë gjithnjë fitues?!…
