Një 28-vjeçar në Lezhë ka rënë në prangat e Policisë, pasi tentoi të vriste duke goditur me automjet nënën 43-vjeçare të bashkëjetueses së tij, duke i shkaktuar dëme trupore.
Përmes një njoftimi, Policia bën të ditur se menjëherë pas ngjarjes, 28-vjeçari Cuf Behi është larguar nga vendi i ngjarjes. E dëmtuara është Klementina Huti.
Gjatë aksionit Policia ka sekuestruar automjetin e përdorur në ngjarje, ndërkohë që mbi 28-vjeçarin rëndon vepra penale “Vrasja për shkak të marrëdhënieve familjare”, mbetur në tentativë.
Ndërkohë bashkëshorti i Klementinës, Agron Huti, ka thënë se gjithë problemin 28-vjeçari e kishte me nusen e tij. Ai ka treguar gjithashtu se bashkëshortja e tij ka dëmtime në pjesën e shpatullës, deri te kofsha.
“Parmbrëmë në orën 02:04 minuta. Në moment e kam çuar me makina kështu, pastaj ka ardhur Policia atje. E kemi çuar te spitali i Traumës. Pjesën e shpatullës deri te kofsha. Komplet pjesën e brinjëve. S’kam pasur probleme fare. Krejt inatin e ka pasur me nusen, me nusen teme”, ka thënë bashkëshorti i të dëmtuarës.
Njoftimi i Policisë:
Lezhë-Finalizohet operacioni policor i koduar “Reagimi”.
Tentoi të vriste, duke e goditur me automjet nënën e bashkëjetueses, duke i shkaktuar dëmtime trupore, dhe u largua nga vendi i ngjarjes, falë reagimit të menjëhershëm të Policisë, kapet dhe vihet në pranga 28-vjeçari.
Sekuestrohet automjeti i përdorur në ngjarje.
Read more:Vrau dhe plagosi një polic, momenti kur autori i masakrës në Maliq në mbërrin te Spitali i Traumës
Specialistët për Hetimin e Krimeve ndaj Personit në DVP Lezhë, në bashkëpunim me specialistët për Hetimin e Krimeve të Komisariatit të Policisë Lezhë dhe Sektorin e Forcës së Posaçme “Shqiponja”, finalizuan operacionin policor të koduar “Reagimi”, si rezultat i të cilit u arrestua në flagrancë shtetasi C. B., 28 vjeç, banues në Tiranë.
Nga veprimet e para hetimore rezulton se, rreth orës 02:05, në lagjen “Skënderbeg”, në Lezhë, 28-vjeçari ka shkuar me automjet për të marrë bashkëjetuesen e tij. Në këtë moment kanë dalë familjarët e saj dhe, për motive që lidhen me marrëdhëniet familjare, ai dyshohet se ka përplasur me automjet nënën e bashkëjetueses, shtetasen K. H., 43 vjeçe, duke i shkaktuar dëmtime trupore, dhe më pas është larguar nga vendi i ngjarjes.
Si rezultat i reagimit të shpejtë dhe veprimeve intensive të Policisë, në kuadër të operacionit policor të koduar “Reagimi”, u lokalizua, u kap dhe u vu në pranga shtetasi C. B., 28 vjeç, për veprën penale “Vrasja për shkak të marrëdhënieve familjare”, mbetur në tentativë.
E dëmtuara u transportua në Spitalin e Traumës, në Tiranë, ku vijon të jetë nën kujdesin e mjekëve.
Në cilësinë e provës materiale u sekuestrua automjeti i përdorur në ngjarje.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
