Një konflikt për një frigorifer banak ka përfunduar me arrestimin e dy pronarëve të një dyqani elektroshtëpiakesh në zonën e Ish-Doganës, në Tiranë.
Në pranga kanë përfunduar Sefedin Ahmetaj dhe Edjola Harunaj, të cilët dyshohet se dhunuan dhe mbajtën me forcë një kliente e cila e kishte blerë pajisjen në dyqanin e tyre por ishte kthyer me pretendimin se frigoriferi nuk punonte dhe kësisoj kërkonte rimbursimin e plotë. Kërkesa për kthimin e parave është refuzuar nga pronarët dhe situata ka dalë jashtë kontrollit.
Sipas burimeve, klientja, rreth të 40-ve, është mbajtur kundër vullnetit të saj brenda ambienteve të biznesit për gati dy orë dhe është dhunuar nga të dy..
Read more:Nuk duhet t’i lidhni kurrë këto pajisje shtëpiake në një kabllo zgjatuese
Në vendngjarje ka ndërhyrë policia, por edhe aty situata është tensionuar. Dy pronarët dyshohet se kanë kundërshtuar efektivët, ndërsa Edjola Harunaj akuzohet se i ka shkaktuar punonjësit të policisë djegie në dorë me cigare.
Pas ngjarjes, të dy pronarët u arrestuan, ndërsa hetimet vijojnë për të sqaruar të gjitha rrethanat e konfliktit.
Njoftimi i plotë i Policisë
“Shërbimet e Komisariatit të Policisë Nr. 6 arrestuan në flagrancë shtetasit S. A., 63 vjeç, dhe E. H., 41 vjeçe, pasi dyshohet se, gjatë një konflikti për motive të dobëta me një kliente në një dyqan elektroshtëpiakesh në zonën e Ish-Doganës, e kanë kanosur, i kanë hequr lirinë duke e mbajtur kundër vullnetit të saj në ambientet e subjektit dhe kanë ushtruar dhunë fizike ndaj saj. Gjatë ndërhyrjes së shërbimeve të Policisë, këta shtetas kanë kundërshtuar me forcë punonjësit e Policisë, ndërsa shtetasja E. H. dyshohet se ka goditur për shkak të detyrës një punonjës policie, duke i shkaktuar dëmtime të lehta”
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
