Ishte konceptuar një bibliotekë brenda një oazi të gjelbër, por pamja që të ofron 1 vit pas çeljes, “Tirana Moons” nuk i përngjan më hapësirës miqësore për mjedisin, sikurse ishte ideja fillestare e instalacionit të vendosur në sheshin “Nënë Tereza”.
Të gjitha bimët rreth e rrotull janë të thara. Në sy, bie edhe mungesa e kujdesit, ku qartë kuptohet se prej kohësh bimët as nuk janë ujitur.
Vepra arkitekturore ‘Tirana Moons’, e arkitektit të njohur austriak Chris Precht u çel në tetor të vitit të kaluar si bibliotekë urbane e hapur dhe format e ndriçimi i saj i ngjajnë Hënës.
Ky instalacion lëvizës i ndërtuar me dru, sipër ka hënat në formë sferike të mbuluara me tendë, ndërsa ishte konceptuar si një hapësirë miqësore për mjedisin, por edhe për njerëzit, sidomos studentët, për të lexuar jo vetëm koleksionin e veprave që ndodhen në të, por edhe librat që merren me vete nga qytetarët.
Kjo hapësirë inovative e krijuar me synimin për të promovuar leximin si një aktivitet i rëndësishëm për shoqërinë ka kushtuar rreth 38 milionë lekë.
