Teksa përdorimi i skuterëve po shtohet çdo ditë në qytetet shqiptare, edhe aksidentet me to po bëhen gjithnjë e më të shpeshta. Pasditen e sotme, dy persona mbetën të lënduar në Vlorë pas përplasjes së dy skuterëve. Aksidenti ndodhi në bulevardin “Ismail Qemali”, në zonën e njohur si Aleksandria, ku, për shkaqe që ende nuk dihen, dy mjetet u përplasën me njëri-tjetrin.
Si pasojë e përplasjes, të dy drejtuesit pësuan lëndime dhe u transportuan me ambulancë në Spitalin Rajonal të Vlorës, ku po marrin ndihmën e nevojshme mjekësore.
Në vendngjarje mbërritën shërbimet e Policisë, të cilat nisën veprimet për zbardhjen e rrethanave dhe shkaqeve të aksidentit.
