As SHBA-të dhe as Irani nuk e kanë konfirmuar publikisht kohën, përkatësisht pjesëmarrjen e bisedimeve.
Megjithatë, televizioni shtetëror iranian ka mohuar se ndonjë zyrtar është tashmë në kryeqytetin e Pakistanit.
Por ndërmjetësuesit e udhëhequr nga Pakistani morën konfirmim se negociatorët kryesorë, zëvendëspresidenti i SHBA-së, JD Vance dhe kryetari i parlamentit të Iranit Mohammad Bagher Qalibaf, do të mbërrijnë në Islamabad të mërkurën herët, thanë zyrtarët për Associated Press.
Ata kanë folur në kushte anonimiteti sepse nuk ishin të autorizuar të informonin gazetarët.
Lajmi vjen në kohën kur pritet të skadojë një armëpushim dyjavor.
Dhe sipas mediave të huaja, përcjell Telegrafi, Pakistani po përgatitet për një raund të ri bisedimesh edhe pasi Presidenti i SHBA-së Donald Trump duket se “i hodhi ujë të ftohtë” shpresave për arritjen e një marrëveshjeje për t’i dhënë fund luftës.
Trump i tha Bloomberg News të hënën se është “shumë e pamundur” të rinovojë armëpushimin që do të skadojë të mërkurën.
Në anën tjetër, Mohammed Bagher Qalibaf, kryenegociatori i Iranit dhe kryetar i parlamentit, shkroi në një postim në X të martën herët se “Ne nuk pranojmë negociata nën hijen e kërcënimeve” dhe Republika Islamike është përgatitur “të zbulojë karta të reja në fushën e betejës”.
Që nga fillimi i luftës, luftimet kanë vrarë të paktën 3,375 njerëz në Iran dhe më shumë se 2,290 në Liban.
Përveç kësaj, 23 njerëz kanë vdekur në Izrael dhe më shumë se një duzinë në shtetet arabe të Gjirit.
Pesëmbëdhjetë ushtarë izraelitë në Liban dhe 13 anëtarë të shërbimit amerikan në të gjithë rajonin janë vrarë, gjithashtu. /Telegrafi/
