Ndryshimet te mikrobet që jetojnë në zorrë mund të identifikojnë njerëzit me rrezik më të lartë për sëmundjen e Parkinsonit shumë përpara se simptomat të shfaqen, sipas një studimi që sinjalizon edhe mundësi për terapi të reja.
Studiuesit zbuluan ndryshime karakteristike në mikrobiomën e zorrëve që janë më të theksuara te njerëzit me rrezik gjenetik për sëmundjen e Parkinsonit dhe më të forta te ata që tashmë janë diagnostikuar.
Ky “nënshkrim” mund t’i ndihmojë mjekët të identifikojnë pacientët në rrezik për Parkinson vite përpara se të shfaqin simptomat dhe tregon se dieta më e shëndetshme dhe trajtimet që riformësojnë mikrobiomën mund të parandalojnë ose vonojnë sëmundjen.
Prof. Anthony Schapira, drejtues i neuroshkencës klinike dhe të lëvizjes në University College London dhe autori kryesor i studimit, tha se kjo ishte hera e parë që një tregues mikrobik te pacientët me Parkinson është parë edhe te njerëzit me ndjeshmëri gjenetike, por që ende nuk kanë zhvilluar simptoma. Treguesi duket se bëhet më i fortë ndërsa sëmundja përparon.
“Këto ndryshime të njëjta mund të gjenden në një pjesë të vogël të popullsisë së përgjithshme, gjë që mund t’i vendosë ata në rrezik më të lartë,” tha Schapira.
Rastet e Parkinsonit janë dyfishuar në 25 vitet e fundit, me më shumë se 8.5 milionë njerëz në mbarë botën që jetojnë tani me të. Sëmundja shkakton dëmtim progresiv të trurit, duke çuar në dridhje, lëvizje të ngadalta dhe muskuj të ngurtë e jo fleksibël. Pacientët shpesh përjetojnë depresion, ankth, probleme me gjumin dhe kujtesën, si dhe vështirësi në ekuilibër.
Parkinsoni shkaktohet nga vdekja e neuroneve në tru. Humbja e qelizave nervore çon në ulje të dopaminës në tru, e cila është përgjegjëse për shumë nga simptomat e sëmundjes. Nuk ka kurë, por barnat që rrisin dopaminën mund të ndihmojnë, së bashku me fizioterapinë dhe kirurgjinë.
Ekipi i UCL analizoi të dhëna klinike dhe të jashtëqitjes nga 271 pacientë me Parkinson, 43 persona me një gjen rreziku për sëmundjen por pa simptoma klinike, dhe 150 njerëz të shëndetshëm.
Prania e më shumë se një të katërtës së mikrobeve të zorrëve, ose 176 specieve, ndryshonte te ata me Parkinson krahasuar me grupin e shëndetshëm. Këto ndryshime nuk u ndikuan nga ilaçet. Një model i ngjashëm u pa edhe te njerëzit me predispozitë gjenetike për Parkinson, por pa simptoma.
Shkencëtarët i konfirmuan rezultatet me të dhëna të mëtejshme mjekësore nga 638 persona me Parkinson dhe 319 persona që gëzonin shëndet të plotë nga Mbretëria e Bashkuar, Koreja e Jugut dhe Turqia. Një pjesë e vogël e grupit të dytë kishin gjithashtu këtë tregues mikrobik, duke sugjeruar se mund të ishin pacientë potencialë, sipas Nature Medicine.
Nuk është ende e qartë nëse ky tregues mikrobik e shkakton Parkinsonin apo anasjelltas, ose të dyja, por Schapira tha se ndryshimet në mikrobiomë mund të ndikojnë në prodhimin e një proteine të quajtur alfa-sinukleinë, e cila luan rol të rëndësishëm në dëmtimin e neuroneve në këtë sëmundje.
“Disa baktere shkaktojnë inflamacion në murin e zorrës që rrit alfa-sinukleinën, e cila më pas transportohet përmes nervit vagus nga zorra në tru dhe më pas në qelizat e trurit të prekura nga Parkinsoni,”tha ai. Nervi vagus transporton informacion midis trurit dhe organeve kryesore.
Nevojiten kërkime të mëtejshme dhe prova klinike për të kuptuar lidhjen mes mikrobeve të zorrëve dhe Parkinsonit dhe nëse riformësimi i mikrobiomës mund të mbrojë kundër sëmundjes, por ndryshimet në dietë mund të ndihmojnë. Personat e përfshirë në studim të cilët shfaqnin këtë tregues, konsumonin më shumë ushqime të përpunuara dhe yndyrna të ngopura, në vend të frutave, perimeve, fibrave, peshkut dhe thjerrëzave./The Guardian
