Rreth 20 mijë hektarë tokë bujqësore janë pa ujë për vaditje, prej më shumë se 35 vitesh në Zharrëz dhe Luar të Bashkisë Roskovec.
Dy rezervuarët e kësaj zone nuk arrijnë të furnizojë tokat për shkak të amortizimit të infrastrukturës vaditëse.
Vetëm në Zharrëz janë rreth 600 familje që jetojnë kryesisht me bujqësi. Për të siguruar ujë, një pjesë e tyre kanë hapur puse, ndërsa shumë të tjerë, të pamundur për të përballuar kostot, i kanë lënë tokat djerrë.
“Ka vite që nuk vjen më uji. Kemi atë rezervuarin aty që është bërë në kohën e Enver Hoxhës. Me kalimin e viteve, i prishën edhe portën ata atëherë. Ujin s’ke ku e gjen. Kemi hapur një pus atje dhe me anë të puseve…”, tha një banor i zonës.
Agronomi Ardian Rama tregon se mungesa e investimeve e ka lënë këtë zone të thahet për ujë. Kanalet vaditëse janë jashtë funksionit dhe në shumë segmente nuk kalon më asnjë pikë ujë.
“Për kaq vite këtu nuk është bërë asnjë investim. Pa ujë nuk ka jetë. Nëse nuk ka ujë… Kanë ardhur kanë thënë qeveria socialiste ‘do vadisim, do bëjmë’…”, tha Ardian Rama.
Kryeplaku i fshatit, Abedin Hoxha, thotë se situata kërkon ndërhyrje urgjente.
“Shikojmë që rezervuari është me ujë. Tani ne ju lutemi institucioneve shtetërore kush e ka në mbikëqyrje, që të vijnë të hapin portat, sepse janë të bllokuara”, tha kryeplaku i fshatit.
Mungesa e vaditjes ka ndikuar ndjeshëm jo vetëm në rënien e prodhimit bujqësor, por edhe në shpopullimin e zonës.
