Dritan Goxhaj dhe 10 protestës të tjerë janë vënë nën hetim nga Policia e Tiranës pasi kanë bllokuar akset rrugore dhe kanë penguar qarkullimin e mjeteve gjatë protestave të zhvilluara më datë 22 dhe 23 qershor.
Goxhaj, 3 ditë më parë lexoi në emër të grupit protestues kërkesat që qytetarëve i drejtonin qeverisë dhe kryeministrit Edi Rama e është po ai, i cili ka udhëhequr turmën jashtë perimetrit të njoftuar për zhvillimin e tubimit. Goxhaj ka shprehur hapur mbështetjen e tij për regjimin iranian ndërsa nga qeveria është cilësuar si mbështetës i influencës iraniane që po nxit zhvillimin e protestave.
Kjo nuk është hera e parë që Policia e Tiranës, për të njëjtat vepra penale, vë nën hetim protestës. Dhjetëra të tjerë janë proceduar penalisht për shkak të shkeljes së njoftimit për mbajtjen e protestës, bllokimin e akseve rrugore e prishjen e qetësisë publike.
“Tiranë
Në vijim të veprimeve hetimore dhe procedurale të kryera nga strukturat e Komisariatit të Policisë Nr. 3, në lidhje me tubimet e zhvilluara më datat 22 dhe 23 qershor 2026, në Tiranë, janë identifikuar dhe proceduar penalisht 11 shtetas, të dyshuar të përfshirë në veprime që cenojnë rendin dhe qetësinë publike.
Konkretisht, u proceduan në gjendje të lirë, për veprën penale “Pengimi i qarkullimit të mjeteve të transportit”, shtetasit: D. G., 50 vjeç, I. D., 55 vjeç, E. E., 32 vjeç, E. B., 29 vjeç, V. D., 30 vjeç, E. Z., 26 vjeç, Xh. P., 27 vjeç, B. K., 36 vjeç, D. B., 32 vjeç, Sh. B., 34 vjeç dhe I. M., 28 vjeç.
Nga veprimet hetimore dyshohet se këta shtetas kanë orientuar dhe zhvilluar tubimin në zona të ndryshme prej atyre të njoftuara zyrtarisht, konkretisht në: kryqëzimin e rrugës “Urani Pano” me bulevardin “Zogu I”; kryqëzimin e rrugës “Ibrahim Rugova” me Rrugën e Kavajës; si dhe në kryqëzimin e rrugës “Ibrahim Rugova” me bulevardin “Gjergj Fishta”.
Si pasojë, në këto akse me fluks të lartë lëvizjeje të automjeteve dhe qytetarëve, është penguar lëvizja e lirë e automjeteve dhe qytetarëve.
Materialet procedurale iu referuan Prokurorisë së Tiranës, për veprime të mëtejshme”, njofton policia.
Kërkesat e lexuara nga Dritan Goxhaj në protestë, i shërbejnë planit të tij utopik që e ka publikuar në profilin e tij në facebook më 14 qershor. Plani parashikon shpërndarjen e Kuvendit dhe zëvendësimin e tij me një Asamble Tranzitore prej 101 anëtarësh, të përzgjedhur me short nga qytetarët.
Kjo Asamble do të emëronte, po me short, një qeveri tranzitore 12-mujore me kompetenca të kufizuara, e cila do të kishte për detyrë rishkrimin e Kushtetutës. Më pas, Kushtetuta e re do t’i nënshtrohej një referendumi popullor dhe vetëm në rast se do të miratohej nga qytetarët, vendi do të mund të shkonte në zgjedhje të parakohshme.
Read more:Blushi: Transparencë e plotë për lobimin e Metës, GJKKO të sigurojë provat dhe dokumentet nga SHBA
Bëhet fjalë për një plan utopik që përplaset hapur me Kushtetutën aktuale, por që, me sa duket, grupi i organizatorëve beson se mund ta zbatojë duke rrëzuar përmes protestave jo vetëm qeverinë, e cila mbështetet nga 83 mandate parlamentare, por edhe Kuvendin, ku bëjnë pjesë 140 deputetë.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
