Në Kukës kanë nisur punimet për ndërtimin e Institucionit të ri të Ekzekutimit të Vendimeve Penale, një investim me vlerë 6.4 milionë euro që synon modernizimin e sistemit penitenciar në vend.
Në ceremoninë e organizuar ishte i pranishëm ministri i Drejtësisë, Toni Gogu, i cili e cilësoi projektin si një hap të rëndësishëm në vijimin e reformës në drejtësi. Ministri Gogu tha se objekti i ri do të ndërtohet në territorin e ish-batalioneve ushtarake dhe do të ketë kapacitet për 150 persona të privuar nga liria.
Institucioni do të lehtësojë gjithashtu akomodimin e rreth 40 shtetasve të Kosovës që vuajnë dënimin në Shqipëri. Projekti parashikon edhe krijimin e rreth 140 vendeve të reja të punës për komunitetin lokal.
Gjatë fjalës së tij, ministri Gogu u shpreh se reforma në drejtësi nuk përfundon me vendimin e gjykatës, por vijon edhe me mënyrën se si shteti administron ekzekutimin e dënimeve.
“Reforma në drejtësi nuk përfundon te gjykata. Ajo vazhdon edhe në mënyrën se si shteti administron vuajtjen e dënimit”, tha Gogu.
Ministri theksoi gjithashtu se sistemi penitenciar duhet të garantojë njëkohësisht sigurinë dhe respektimin e të drejtave të njeriut, duke e konsideruar këtë si një nga objektivat kryesore të reformës.
Institucioni i ri në Kukës do të ofrojë ambiente moderne për rehabilitim, arsimim dhe formim profesional, shërbime shëndetësore, ambiente për vizitat familjare, si dhe do të ndërtohet sipas standardeve të efiçiencës energjetike, me synimin për të krijuar kushte bashkëkohore për rehabilitimin dhe riintegrimin e personave të privuar nga liria.
