Kreu i Grupit Parlmentar të PD, Gazment Bardhi i është drejtuar selive diplomatike në Shqipëri dhe institucioneve ndërkombëtare, duke ngritur shqetësimin se procesi i reformës administrativo-territoriale po zhvillohet në kundërshtim me standardet demokratike dhe pa konsensus politik.
Në letrën e datës 27 korrik 2026, Bardhi argumenton se qasja e shumicës socialiste bie ndesh me standardet ndërkombëtare, kërkesat e institucioneve evropiane, Kartën Evropiane të Vetëqeverisjes Vendore dhe detyrimet që Shqipëria ka marrë në kuadër të procesit të integrimit në Bashkimin Evropian.
Sipas tij, ekziston rreziku që rishikimi i kufijve administrativë të përdoret për të realizuar një rikonfigurim territorial me ndikim elektoral, duke ndikuar rezultatet e zgjedhjeve të ardhshme vendore dhe, në mënyrë të tërthortë, edhe ato parlamentare.
Read more:Bardhi: Të hetohet me urgjencë denoncimi i Gent Prognit për tentativë sulmi me thikë
“Ndryshimi i kufijve të bashkive dhe qarqeve pa marrëveshje politike, pa konsensus dhe pa një proces gjithëpërfshirës e transparent krijon në mënyrë të pashmangshme pasoja elektorale dhe avantazhe për shumicën në pushtet. Për këtë arsye, një reformë e tillë nuk mund të konsiderohet e qëndrueshme dhe as e pranueshme nga të gjitha palët politike”, thuhet në letrën e Bardhit.
Kreu i Grupit Parlamentar të PD u kërkon partnerëve ndërkombëtarë të ndërhyjnë dhe të apelojnë publikisht ndaj autoriteteve shqiptare për rishqyrtimin e vendimit, rivendosjen e mandatit të Komisionit të Posaçëm deri në tetor 2026 dhe garantimin që reforma të përfundojë përmes një procesi plotësisht gjithëpërfshirës, transparent dhe të bazuar në konsensus.
Read more:Fabiola Hysenbelliu: Universiteti “Luarasi” diplomë të dyfishtë me London School of Economics
Në letër kërkohet gjithashtu që çdo produkt i Komisionit, përpara miratimit në seancën plenare të Kuvendit, të certifikohet nga Komisioni i Venecias ose nga Kongresi i Autoriteteve Lokale dhe Rajonale i Këshillit të Evropës, të cilat konsiderohen si organizmat më të specializuara në këtë fushë.
Ndërkohë, Grupi Parlamentar i Partisë Demokratike bën të ditur se ka përgatitur edhe një raport të detajuar mbi ecurinë e procesit, ku argumenton se mazhoranca ka shkelur parimet evropiane që duhet të udhëheqin reformën administrativo-territoriale.
