Banorët e 7 fshatrave të Njësive Administrative Polis dhe Valë në Librazhd i janë drejtuar Autoritetit Rrugor Shqiptar me kërkesë për ndërtimin e një hyrje-daljeje të re në karrexhatën e majtë të rrugës së re ‘Elbasan-Qafë Thanë’, pjesë e Korridorit VIII.
Në kërkesën e tyre, kërkojnë që hyrje-dalja të ndërtohet pranë urës së Mirakës. Sipas tyre, kjo do të mundësonte akses më të shpejtë drejt fshatrave, pa qenë nevoja për të përdorur Nyjen e Xibrakës.
Banorët argumentojnë se nga Xibraka rruga zgjatet me rreth 6 kilometra. Sipas tyre, mungesa e një lidhjeje direkte me autostraden mund shkaktojë vonesa prej rreth 15 deri në 20 minuta për ambulancat.
Në përgjigje, ARRSH sqaron se projekti për segmentin “Zgjerimi i rrugës Elbasan-Qafë Thanë, Faza II” nuk parashikon ndërtimin e një hyrje-daljeje të tillë.
Sipas Autoritetit Rrugor, aksesi i banorëve në rrugën kryesore parashikohet përmes rrugëve lidhëse ekzistuese dhe Nyjes së Xibrakës.
Read more:Mirditë/ Humbi kontrollin e motorit, ndërron jetë shqiptari i Kosovës
ARRSH thekson se kërkesa e banorëve do të kërkonte një ndërhyrje që nuk është pjesë e projektit. Megjithatë, ARRSH nuk e refuzon plotesisht kerkesen. Në përgjigjen zyrtare thuhet se do të shqyrtohet mundësia e realizimit të një zgjidhjeje tjetër teknike. Çdo ndërhyrje e mundshme, sipas ARRSH-së, do t’i nënshtrohet vlerësimit teknik, kushteve të terrenit dhe standardeve të sigurisë rrugore.
