Në Kukës, një prej bashkive me popullsinë më të vogël në vend, gjatë 8-mujorit të këtij viti janë regjistruar 141 martesa. Shifra është pothuajse e njëjtë me atë të së njëjtës periudhë të vitit të kaluar.
Për çiftet që zgjedhin të kurorëzojnë martesën në qytetin e Kukësit, tashmë ka një hapësirë të re.
Sapo është hapur Zyra e Lidhjeve Martesore, ndërsa Bashkia ka përfunduar edhe rikonstruksionin e ambienteve të Zyrës së Gjendjes Civile dhe zyrës së aplikimit për pasaporte.
Read more:Pas largimit nga PD, Jola Hysaj emërohet në krye të Agjencisë Kombëtare të Turizmit.
Përgjegjësi i Zyrës së Gjendjes Civile, Ervin Spahiu, thotë se ambienti i ri synon të lehtësojë procedurat e celebrimit dhe t’u ofrojë çifteve, familjarëve dhe dëshmitarëve kushte më dinjitoze për ceremoninë zyrtare.
Popullsia e Kukësit ka pësuar një rënie të ndjeshme gjatë dekadës së fundit. Sipas Censit 2023, në Bashkinë Kukës jetojnë 36.125 banorë, nga 47.985 që numëroheshin në Censin e vitit 2011.
Në 12 vjet, Kukësi ka humbur rreth 11.860 banorë, ose gati një të katërtën e popullsisë, me emigrimin si një nga faktorët kryesorë të kësaj tkurrjeje demografike.
