Lokali në Durrës i Rigels Rajkut, reperit të njohur si Noizy, është vënë sërish në shënjestër. Në orët e para të mëngjesit, në derën e biznesit në lagjen nr. 13 është gjetur një sasi e vogël tritoli e pashpërthyer.
Dyshohet se lënda plasëse është vendosur në formë presioni ndaj këngëtarit.
Grupi hetimor vijon veprimet për zbardhjen e plotë të rrethanave dhe identifikimin e autorit/ëve.
Artistit Rigels Rajku dyshohet se në vitin 2022 iu vendos tritol në lokal, sipas SPAK me urdhër të Laert Haxhiut, pasi reperi i kishte rrahur mikun e tij Cllevio (Kleviol Ahmeti). Cllevio ka mohuar vendosjen e tritolit dhe ka thënë se nuk e ka kërkuar asnjëherë ndihmën e Haxhiut për sherrin me Noizyn.
Rreth 100 gr tritol shpërtheu në biznesin e reperit qershorin e atij viti. Dëmet materiale në dyqanin e veshjeve dhe lokalin që ndodhen në katin e parë e të dytë të një pallati pranë zonës bregdetare të Durrësit ishin të mëdha. Lënda plasëse ishte vendosur në murin e jashtëm të biznesit dhe ishte ndezur me fitil përcjellës.
Sipas dëshmisë në GJKKO të të penduarit të drejtësisë, Artan Tafanit, ishte ky vetë në krye të operacionit, ndërsa komandimin e bënte Laert Haxhiu nga distanca.
4 vite pas ngjarjes, babai i Noizyt, Bashkim Rajku, ka thënë se ende sot nuk e di arsyen pse i vunë tritol në biznesin familjar.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
