Mungesa e infrastrukturës dhe e ujit të pijshëm ka ngritur në protestë banorët e fshatit Gjorm në Kurbin. Ata u mblodhën në qendër të fshatit, në shenjë indinjate ndaj pushtetit vendor dhe qendror, për të cilin thonë se i ka lënë në harresë dhe nuk ka realizuar investime për përmirësimin e kushteve të jetesës.
Banorët shprehen se degradimi i rrugës me gjatesi rreth 2 km që lidh Gjormin me autostradën Milot–Thumanë dhe aksin nacional Laç–Mamurras ua ka vështirësuar ndjeshëm lëvizjen dhe jetën e përditshme.
Një tjetër problem shqetësues, sipas tyre, është mungesa e ujit të pijshëm, te cilin detyrohen ta blejnë ose ta mbushin në burime disa km larg fshatit.
“Kemi bërë shumë kërkesa po asnjë nuk na i ka marrë parasysh”, tha një banor.
“U bë 15 vjet as një zhavor nuk është hedh, vetëm çfarë bën komuniteti”, shtoi një tjetër banor.
“Pa ujë dhe pa rrugë, jemi të vdekur”, tha një tjetër.
“Nuk kemi as rrugë dhe as ujë të pijshëm. Këtu nuk ka pasur investim që prej 35 vitesh”, tha një banor.
Në mbështetje të banorëve në protestë ishte edhe deputeti i Partisë Demokratike, Kastriot Piroli, së bashku me këshilltarët opozitarë të Bashkisë Kurbin, Albert Ndoci dhe Safedin Lika. Ata kërkuan ndërhyrjen e institucioneve për zgjidhjen e problematikave të ngritura nga banorët.
Në fshatin Gjorm jetojnë mbi 250 familje, të cilat përballen prej vitesh me mungesën e investimeve në infrastrukturë dhe shërbimet bazë. Shqetësim mbetet dhe përmbytjet e vazhdueshme kur ka reshje shiu si dhe mungesa e mbrojtëse anësore në urën mbi kanalin e ujërave të larta, çka po rrezikon jetën e fëmijëve.
