6 vatra zjarri janë aktive dhe 4 nën mbikëqyrje, sipas bilancit të 24 orëve të fundit.
Në Gojan–Gjegjan, Pukë vijon operacioni i përforcuar me 190 forca në terren dhe 1 ekskavator, 1 mjet zjarrfikës dhe 2 helikopterë të FA-së si mbështetje.
Mbetet aktive vatra e zjarrit në Tenë të Rrëshenit, por pa rrezik për banesat. Në Shtuf, Mirditë, vatra mbetet aktive dhe ndërhyrja vijon aty ku e mundëson terreni, ndërsa pjesët e thepisura vështirësojnë përdorimin e mjeteve zjarrfikëse.
Në Bërshi, Klos, gjatë natës janë riaktivizuar disa vatra për shkak të erës.
Në Dukat të Vlorës, zjarri është vendosur në kontroll pas dy ditëve në luftë me flakët. Për shmangien e riaktivizimit të të tij, shërbimi zjarrfikës ndodhet në terren për monitorimin e zonës.
Në Malin e Dajtit në Tiranë, sot vijon ndërhyrja në vatrat e mbetura me 30 efektivë të FA-së. Nuk ka rrezik për zonat e banuara.
Lajm në përditësim…
Zjarri në Gojan të Pukës, administratori apostolik i dioqezës së Sapës: Malet e Shqipërisë janë bërë shkrumb e hi nga pakujdesia (VIDEO)
Administratori apostolik i dioqezës së Sapës, Atë Mariano Tarantino shprehu keqardhje që malet e vendit tonë janë bërë shkrumb e hi si pasojë e pakujdesisë.
Në veçanti ai theksoi edhe situatën e vështirë në Gojan të Pukës, ku disa shtëpi janë djegur.
Në mesazhin e tij ai bëri thirrje që të gjithë qytetarët të kujdesen për mjedisin dhe të mos vënë zjarre.
“Si kishë katolike po ndjekim situatën e zjarreve në mënyrë të veçantë në Gojan të Pukës, ku zjarri ka djegur edhe përpirë çdo gjë. Malet e Shqipërsië janë bërë shkrumb e hi për shkak të pakujdesisë sonë. Një falenderim shkon për të gjithë ata që kanë fikur zjarret. Ne duhet të jemi më të kujdesshëm në ruajtjen e mjedisit, kjo është përgjegjësia e të gjithëve”,tha ai.
Dy ditë në luftë me flakët, vihet nën kontroll zjarri në Dukat të Vlorës dhe malin e Çikës (VIDEO)
Zjarri i përmasave të mëdha që përfshiu zonën e Dukatit dhe malin e Çikës është vënë nën kontroll nga forcat zjarrfikëse.
Pavarësisht neutralizimit të flakëve, zjarrfikësit vijojnë punën në terren, në një zonë të vështirë malore, me qëllim shmangien e riaktivizimit të vatrave nga era dhe parandalimin e rindezjes së zjarrit.
Zjarri, i cili prej më shumë se dy ditësh përfshiu këtë zonë, dogji një sipërfaqe të konsiderueshme me shkurre dhe pisha, ndërsa ndërhyrja e forcave në terren vijon për të eliminuar çdo rrezik të mundshëm të rindezjes.
