Aktivisti Arben Kola ka mbajtur një fjalim në protestën kundër kryeministrit Edi Rama, duke deklaruar se shqiptarët janë lodhur nga skandalet dhe akuzat për korrupsion.
Kola tha se vendi po përballet me një situatë që, sipas tij, pritet të bëhet edhe më e tensionuar gjatë vjeshtës, ndërsa denoncimet për skandale të reja vijojnë të publikohen çdo ditë. Aktivisti theksoi se protestuesit nuk kërkojnë ndryshime të pjesshme në qeveri apo zëvendësim ministrash, por dorëheqjen e kryeministrit.
Sipas tij, edhe një ndryshim i plotë i kabinetit qeveritar nuk do të mjaftonte për të qetësuar protestuesit.
“Ne presim vjeshtën e nxehtë nga ana njerëzore. Çdo ditë skandalet e panjohura më parë dalin në shesh përmes denoncimeve. Shqiptarëve iu ka ardhur në majë të hundës , nuk e durojnë më këtë vjedhje. Për protestuesit ka vetëm një qëllim dhe një kërkesë, dorëheqje. Nuk duam asnjë ministri dhe asnjë ndryshim kabineti. Fasadat nuk pinë më ujë për popullin shqiptar. Ai po të dojë të ndryshojë të gjithë kabinetit, për ne nuk përbën aspak lajm. Objektivi është i qartë, rrëzimi i Ramës, i qeverisë, qeveri teknike e me radhë. I pabesi nuk ka besë”, tha ai.
