Mbi 400 shkolla në të gjithë vendin do të ofrojnë këtë vit programin “Pas Shkolle”, një nga risitë me të cilat Ministria e Arsimit synon të zgjerojë aktivitetet për nxënësit edhe pas përfundimit të mësimit. Programi nuk do të kufizohet vetëm te qëndrimi në shkollë, por do të përfshijë aktivitete artistike, sportive, sociale, artizanale dhe të tjera në bashkëpunim me komunitetin.
Risitë e vitit të ri shkollor u prezantuan nga ministrja e Arsimit, Mirela Kumbaro, në një takim me drejtuesit e arsimit parauniversitar nga e gjithë Shqipëria, ku u diskutuan edhe përgatitjet për nisjen e procesit mësimor.
Read more:Gati për shtatorin, Rama publikon pamjet nga shkolla e rikonstruktuar në Patos
Përveç zgjerimit të programit “Pas Shkolle”, këtë vit do të hyjnë në zbatim kurrikulat e reja për klasat e para, të gjashta dhe të dhjeta. Nxënësit nga klasa e parë deri në të pestën do të pajisen me tekste të reja falas, ndërsa do të vijojë edhe zbatimi i udhëzimit që ndalon përdorimin e celularëve në shkolla.
Sipas Ministrisë së Arsimit, gjatë këtij viti do të hapin dyert 42 objekte të reja arsimore dhe terrene sportive me kushte bashkëkohore. Ndërkohë, faza e dytë e regjistrimeve për klasën e parë dhe të dhjetë do të mbetet e hapur deri më 7 shtator.
