Pas marrjes së kompetencave të kryetarit të Bashkisë së Tiranës, Erion Veliaj, ka nisur një aksion i gjerë në disa prej zonave më problematike të kryeqytetit për pastrimin e qytetit dhe rikthimin e normalitetit pas sezonit veror.
Sipas Bashkisë së Tiranës, grupet e punës kanë ndërhyrë në zonën e Bregut të Lumit, Babrrusë dhe Urës së Kamzës. Zyrtarë të Bashkisë së Tiranës bënë të ditur se ndërhyrjet do të vijojnë çdo ditë dhe do të shtrihen në të gjitha pikat problematike të Tiranës.
“Këtu jemi tek zona e Bregut të Lumit, një nga zonat më problematike të Tiranës. Kemi disa ditë që po vazhdojmë me aksionin e pastrimit, së bashku edhe me ndërmarrjet e tjera të Bashkisë, bazuar në direktivat e kryetarit, për të ndërhyrë në të gjitha pikat problematike, në gjithë Tiranën. Aksionet do vijojnë çdo ditë. Ne do jemi në të gjithë pikat problematike, për të ndërhyrë dhe për t’i pastruar ato”, sqarojnë zyrtarët e bashkisë.
Bashkia nënvizon gjithashtu edhe se krahas punës që do të vijojë çdo ditë, është i domosdoshëm edhe bashkëpunimi i qytetarëve për të mbajtur të pastër kryeqytetin.
