Protesta e sotme kundër klasës politike ka nisur prej orës 17:00 dhe shënon ditën e 101-të të rezistencës qytetare në Tiranë. Fillimisht protestuesit u stacionuan para Kuvendit dhe në disa prej rrugëve pranë institucionit, ku lëshuan thirrje kundër qeverisë së Edi Ramës dhe kërkuan dorëheqjen e kryeministrit.
Gjatë tubimit pati edhe momente tensioni, ndërsa protestuesit u përplasën me policinë. Në disa raste pati përplasje fizike dhe ndërhyrje të forcave të rendit.
Sipas raportimeve nga vendngjarja, rreth 20 persona janë shoqëruar nga policia, disa prej tyre në mënyrë të dhunshme. Mes personave të shoqëruar janë edhe kreu i “Shqipëria Bëhet”, Adriatik Lapaj, dhe gazetari Shpend Gashi.
Protestuesit kanë lëshuar edhe thirrje kundër deputetëve, duke i cilësuar me slogane si “Deputetë analfabetë”, ndërsa gjatë tubimit pati edhe tensione rreth automjeteve të disa deputetëve.
Pas qëndrimit për disa minuta në bulevardin “Dëshmorët e Kombit”, protestuesit kanë vijuar marshimin drejt zonës së ish-Bllokut.
Më pas, ata janë zhvendosur përpara Drejtorisë së Policisë së Tiranës, ku vijojnë protestën dhe kërkojnë lirimin e personave të shoqëruar.
“Lironi shqiptarët!” është një prej thirrjeve që po dëgjohet aktualisht para Drejtorisë së Policisë. Protestuesit kërkojnë lirimin e të shoqëruarve.
