Partia e Lirisë ka reaguar pas kërcënimit me vdekje ndaj gazetarit të News24, Osman Stafa, duke e dënuar ashpër ngjarjen. Në deklaratën e saj, PL e lidh kërcënimin me publikimin e pamjeve nga protesta e 8 shtatorit pranë Parlamentit, ku gazetari dokumentoi përplasjet mes policisë dhe protestuesve.
Ne reagimin e Sekretarit të Përgjithshëm të PL, Tedi Blushi, theksohet se autorët e kërcënimit duhet të identifikohen dhe të përballen pa vonesë me drejtësinë, ndërsa përgjegjësia politike për klimën e presionit ndaj gazetarëve i atribuohet kryeministrit Edi Rama. PL akuzon qeverinë për krijimin e një klime intimidimi dhe sulmesh ndaj fjalës së lirë.
Partia e Lirisë kërkon një hetim të menjëhershëm, të plotë dhe transparent për rastin, si dhe garantimin e sigurisë së gazetarit Osman Stafa. Gjithashtu, kërkon transparencë mbi veprimet e strukturave të policisë të dokumentuara në pamjet e publikuara gjatë protestës.
Në përfundim të deklaratës, PL shprehet se qëndron në krah të Osman Stafës dhe gazetarëve të pavarur, duke e cilësuar mbrojtjen e fjalës së lirë si një nga themelet e demokracisë.
Ndërkohë për kërcënimin ka reaguar edhe Greta Bardeli.
“Kërcënimi me jetë ndaj gazetarit Osman Stafa është një kambanë alarmi për gjendjen e medias dhe të fjalës së lirë në vend. Kur kërcënohet një gazetar që prej vitesh denoncon abuzime dhe ngre probleme në sektorin e shëndetësisë, nuk kemi më të bëjmë vetëm me sigurinë e një individi. Kemi të bëjmë me klimën që është krijuar ndaj kujtdo që pyet, heton dhe bezdis pushtetin.
Qeveria nuk mund të mjaftohet me heshtje, ndërsa Policia dhe Prokuroria me njoftime rutinë. Duhet të identifikohen autorët, motivet dhe çdo person që mund të qëndrojë pas kërcënimit. Nëse shteti nuk arrin të mbrojë një gazetar për shkak të punës së tij, atëherë mesazhi është i qartë: ata që kërcënojnë ndihen më të sigurt se ata që denoncojnë.
Ky është problemi politik. Një pushtet që kërkon media të bindur dhe gazetarë të kujdesshëm me pyetjet nuk i shërben demokracisë. Sot është Osman Stafa. Nesër mund të jetë kushdo që refuzon të heshtë. Në një shtet normal duhet të ketë frikë ai që kërcënon, jo gazetari që bën detyrën”, shkruan ajo.
