Ish-deputeti i PD, Ervin Salianji shprehet se kryeministri Edi Rama dhe kreu demokrat, Sali Berisha janë takuar dje në sallën VIP të aeroportit të Rinasit. Në studion e “Minuta e Parë” me Ola Bruko, në News24, Salianji tha se lideri demokrat duhet të tregojë çfarë bisedoi me Ramën.
Salianji denoncoi gjithashtu se janë kërcënuar punonjësit e Gardës të cilët shoqëronin Ramën, pasi nxorën informacionin e takimit me kreu e opozitës.
“Ata u takuan tamam. I takon Sali Berishës si patericë e Edi Ramës të tregojë çfarë ka folur me kryeministrit. Teatër bëjnë sa të duash. Kërcënojnë punonjësit e Gardës me largim nga puna pse më kanë sjellë mua informacion. Ky zotëria duhet të thotë pse i shërben Edi Ramës dhe a kanë bërë marrëveshje këta? Informacioni që kam unë dje, ishte ky. Të dy ishin në të njëjtën kohë në Rinas, Edi Rama ishte në Rinas, shkoi edhe ky. është hera e dytë. Kur shkon Sali Berisha atje, qëllon edhe Edi Ramën. Po të isha unë nuk hyja fare po të ishte Rama. Ça pune ka ky? U vonua edhe konferenca për shtyp e Ramës 1 orë e pak.
Tani ma thoni pak çfarë duhet të bëjë opozita përveçse të reagojë fort, të thërriste ndërkombëtarët dhe të thoshte nuk i mbajmë dot më shqiptarët. Çfarë është ajo në Parlament? U çuan në Parlament e bllokove, i ti Pelesh, me lesh pa lesh, këtu është kapur shefja e shërbimit duke iu shërbyer grupeve kriminale. Si ka mundësi që nuk thërret protestë paradite, pasdite, të ngrejë në këmbë Shqipërinë”, tha Salianji.
