Bllokada politike në Kosovë po e kthen edhe vitin 2026 në një vit të humbur për ekonominë dhe mirëqenien e qytetarëve. Skenat e 27 prillit, gjatë përpjekjeve për zgjedhjen e presidentit të ri, kanë rritur shqetësimin publik. Qytetarët thonë se partitë, në vend që të zgjidhin krizën, po e thellojnë atë. “Topin na e kanë humbë”, tha një qytetar për “RTV21”.

“Këta si me i pagu dikush me punu kundër interesit të shtetit…”, u shpreh një qytetar tjetër . “Kriza krejt botën, çmimet në qiell këta shkaktojnë edhe krizë politike nuk është mirë kjo…”, tha një tjetër qytetar. Sipas RTV21, krizat politike të shkaktuara siç thuhet qëllimshëm nga subjektet politike vlerësohet se janë arsyeja kryesore që qytetarët në Kosovë nuk dëshirojnë të jetojnë në Kosovë.

Drejtori i Dhomës së Tregtisë, Kushtrim Ahmeti, thotë se situata është edhe më shqetësuese për shkak të rritjes së kostove, sidomos pas zhvillimeve në Lindjen e Mesme që kanë ndikuar edhe në çmimin e naftës. Sipas tij, qytetarët nuk kanë marrë masa konkrete mbështetëse, ndërsa pakoja e premtuar prej 200 milionë eurosh ende mbetet e paqartë.

Read more (Kosova):Dështon zgjedhja e presidentit, Kuvendi shpërndahet dhe Kosova shkon në zgjedhje të reja

“Ne po shohim zhvillimet në lindje të mesme na shtrenjtuan naftën në Kosovë. Asnjë masë për qytetarët që ta përballojnë më lehtë këtë krizë nuk u ndërmorr. Kemi një premtim për një pako 200 milionë në kohë të zgjedhjeve që as nuk po dihet se çfarë përmbanë. Dhe në fund qytetarët po ballafaqohen me rritje të varfërisë,…”, tha Ahmeti për RTV21

Edhe njohësi i ekonomisë, Safet Gërxhaliu, thotë se dëmi nga bllokadat politike është i madh. Ai paralajmëron se Kosova nuk mund të përballojë zgjedhje të shpeshta dhe mungesë stabiliteti institucional.

Read more (opozita):Abdixhiku: Pushteti kërkoi nënshtrim, ne zgjodhëm Republikën

“As agjendat më të rrezikshme anti Kosovë nuk do të mund t’i shkaktonin kaq shumë dëme Kosovës sa po i shkaktojnë politikanët. As vendet Evropiane nuk mund t’i përballojnë 5 palë zgjedhje në dy vjet e lëre më një shtet si Kosova…”, u shpreh Gërxhaliu.

Ndërkohë, të dhënat e Agjencisë së Statistikave tregojnë rritje të varësisë së Kosovës nga importi. Vetëm në mars, Kosova importoi mallra mbi 651 milionë euro, ndërsa eksportet arritën në 88.4 milionë euro. Deficiti tregtar kaloi 560 milionë euro, një shifër që ekspertët e shohin si alarm serioz për ekonominë e vendit.

Read more (Albin kurti):S’ka president të ri, Kosova shkon në zgjedhje të parakohshme! Kurti: Opozita do bllokimin e qeverisë!

Që nga mbrëmja e 27 prillit, deputetët e Vetëvendosjes tentuan disa herë të zgjedhin presidentin, por partitë opozitare bojkotuan seancat, pasi nuk u arrit marrëveshje me mazhorancën. Fillimisht ata propozuan Glauk Konjufcën dhe Fatmire Mulhaxha Kollçakun, por më pas u tërhoqën dhe u kandiduan Feride Rushitin dhe Hatixhe Hoxhën. Procesi u shoqërua me akuza për “puç kushtetues” dhe përplasje të forta politike, ndërsa opozita refuzoi të marrë pjesë në votime në të gjitha seancat.

Kryeministri Albin Kurti kërkoi nga Lidhja Demokratike e Kosovës që të sillte një kandidat me 15 nënshkrime, duke ofruar edhe votat për ta futur në garë, por LDK e refuzoi këtë si manovër politike. Edhe Partia Demokratike e Kosovës kërkoi të propozojë vetë kandidatin, duke kundërshtuar mënyrën e procesit. Pavarësisht disa takimeve mes Kurtit, Bedri Hamzës dhe Lumir Abdixhikut, nuk u arrit asnjë marrëveshje. Opozita kundërshtoi gjithashtu idenë që një parti të kontrollojë njëkohësisht Qeverinë, Kuvendin dhe Presidencën.

Read more (Ldk):Kurti: Nuk kam probleme me Osmanin e askënd nga LDK, por s’mund ta di si votojnë deputetët e LVV-së

Afati për zgjedhjen e presidentit përfundoi më 28 prill, sipas vendimit të Gjykatës Kushtetuese, e cila kishte lënë kohë deri në këtë datë për zgjedhjen e pasuesit të presidentes Vjosa Osmani, mandati i së cilës përfundoi më 4 prill. Pas këtij dështimi, vendi pritet të shkojë në zgjedhje të reja brenda 45 ditësh. Këto do të jenë zgjedhjet e tretat brenda një viti e katër muajsh, duke e thelluar edhe më shumë krizën politike në vend.