Këshilli i Lartë i Prokurorisë ka hapur garën për për zgjedhjen e Prokurorit të Përgjithshëm. Sipas njoftimit të bërë në faqen zyrtare kandidatët kanë 30 ditë afat për të bërë aplikimet.
Kandidatët që do të aplikojnë duhet të përmbushin disa kritere: të kenë 15 vjet përvojë pune si jurist të spikatur; të jenë diplomuar në Shkollën e Magjistraturës ose të ketë gradë shkencore në drejtësi; të mos kenë mbushur moshën e daljes në pension; të mos kenë mbajtur gjatë 10 viteve të fundit, funksione politike në administratën publike apo pozicione drejtuese në partitë politike; të mos kenë qenë anëtarë, bashkëpunëtorë ose të favorizuar të ish-Sigurimit të Shtetit para 2 korrikut 1991; të mos kenë qenë dënuar më parë me vendim gjyqësor të formës së prerë për kryerjen e një vepre penale; të mos kenë qenë bashkëpunëtorë, informatorë ose agjentë të shërbimeve të inteligjencës; si dhe të mos kenë masë disiplinore në fuqi.po ashtu, kërkohet të plotësojnë standardet më të larta të integritetit moral dhe profesional, si dhe të aftësive organizative dhe drejtuese.
Kandidatët që plotësojnë këto kushte, ftohen të paraqesin kërkesat e tyre jo më vonë se data 1 gusht, në orën 24:00. Theksojmë se mandati i kryeprokurorit Olsjan Çela mbaron në dhjetor të këtij viti, ( 5 dhjetor 2026). Prokurori i Përgjithshëm, ka mandat 7-vjeçar dhe pa të drejtë rikandidimi.
Njoftimi i plotë:
Bazuar në nenin 148/a, të Kushtetutës së Republikës së Shqipërisë, nenet 22, 29 dhe 30 të Ligjit nr. 97/2016 “Për organizimin dhe funksionimin e prokurorisë në Republikën e Shqipërisë ” i ndryshuar, nenet 3 dhe 4, si dhe Kreun III, të Vendimit të Këshillit nr. 50, datë 19.03.2019, “Mbi kriteret dhe procedurën për zgjedhjen e kandidatëve për Prokuror të Përgjithshëm në Republikën e Shqipërisë”, me Vendimin nr. 109, datë 02.07.2026, “Për fillimin e procedurës për përzgjedhjen e kandidatëve për pozicionin e Prokurorit të Përgjithshëm, përmes thirrjes publike për shprehjen e interesit”, Këshilli i Lartë i Prokurorisë shpall sot thirrjen për fillimin e procedurës administrative për përzgjedhjen e kandidatëve për pozicionin e Prokurorit të Përgjithshëm, përmes thirrjes publike për aplikim.
Këshilli i Lartë i Prokurorisë iu bën thirrje të kandidojnë të gjithë të interesuarve që plotësojnë kushtet e mëposhtme:
1. Të kenë 15 vjet përvojë pune si jurist i spikatur;
2. Të jenë diplomuar në Shkollën e Magjistraturës ose të ketë gradë shkencore në drejtësi;
3. Të mos kenë mbushur moshën e daljes në pension sipas nenit 64, pika 3, të Ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar.
4. Të mos kenë mbajtur gjatë 10 viteve të fundit, para dorëzimit të shprehjes së interesit për Prokuror të Përgjithshëm, funksione politike në administratën publike;
5. Të mos kenë mbajtur gjatë 10 viteve të fundit pozicione drejtuese në partitë politike;
6. Të mos kenë qenë anëtarë, bashkëpunëtorë ose të favorizuar të ish-Sigurimit të Shtetit para 2 korrikut 1991, në kuptimin e Ligjit nr. 45/2015 “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”;
7. Të mos kenë qenë dënuar më parë me vendim gjyqësor të formës së prerë për kryerjen e një vepre penale;
8. Të mos kenë qenë bashkëpunëtorë, informatorë ose agjentë të shërbimeve të inteligjencës;
9. Të mos kenë masë disiplinore në fuqi;
10. Të plotësojnë standardet më të larta të integritetit moral dhe profesional, si dhe të aftësive organizative dhe drejtuese.
Kandidatët që plotësojnë kushtet e sipërpërmendura i paraqesin kërkesat e tyre jo më vonë se data 01.08.2026, ora 24:00.
Krahas kërkesës për kandidim, kandidatët dorëzojnë pranë Këshillit të Lartë të Prokurorisë dokumentacionin e mëposhtëm:
1. Një jetëshkrim të përditësuar;
2. Një platformë personale e qëllimeve dhe objektivave që kandidati propozon të ndjekë, sipas Shtojcës A, bashkëlidhur. Ky dokument duhet të jetë punë origjinale e kandidatit dhe nuk duhet të kalojë 20 faqe, në llojin e shkrimit Times New Roman, madhësia 12, me një njësi hapësire mes rreshtave;
3. Një deklaratë nën përgjegjësi ligjore se nuk ka qenë anëtar, bashkëpunëtor apo i favorizuar nga Sigurimi i Shtetit para vitit 1990;
4. Një deklaratë nën përgjegjësi ligjore se nuk është bashkëpunëtor, informator ose agjent i shërbimeve sekrete;
5. Një vetëdeklarim sipas Ligjit nr. 138/2015 “Për garantimin e integritetit të personave të zgjedhur, emëruar ose që marrin funksione publike”;
6. Formularin “Deklaratë e pasurisë dhe interesave privatë e kandidatit për pozicione të ndryshme në institucionet e sistemit të drejtësisë” të hartuar nga ILDKPI në zbatim të nenit 3/1, të Ligjit nr. 9049/2003, në zarf të mbyllur;
Read more:Simon Cowell pranon gabimin ndaj Susan Boyle: Ishim të tmerrshëm në atë audicion
7. Dëshmi të gjendjes gjyqësore lëshuar nga organi kompetent shtetëror;
8. Vërtetimin/ dokumentacionin e përshtatshëm që provon përvojën e punës së kandidatit për pozicionin për të cilin konkurron;
9. Rezultatet e vlerësimit profesional dhe etik të kandidatëve në punët që kanë bërë në të shkuarën, nëse ka, apo rezultatet e arritura gjatë përvojave të tyre të punës, që lidhen me ushtrimin e funksioneve në fushën e drejtësisë penale;
10. Rezultatet e arritura gjatë studimeve të larta, gjatë formimit fillestar dhe atij të vazhdueshëm në Shkollën e Magjistraturës, dhe në trajnime dhe kurse të certifikuara, brenda dhe jashtë vendit;
11. Rezultatet e arritura gjatë studimeve pasuniversitare në fushën e së drejtës penale;
12. Kopje të noterizuara të dëshmive të gjuhëve të huaja;
13. Kopje të noterizuara të gradës shkencore ose titujve akademikë;
14. Autorizimet për Këshillin sipas Shtojcave B dhe C, bashkëlidhur.
Aplikimet do të dorëzohen brenda afatit të caktuar, në formë elektronike në adresën:
karriera@klp.al (në këtë rast të gjitha dokumentet e sipërpërmendura duhet të jenë të skanuara) ose në formë fizike, personalisht ose përmes shërbimit postar, në adresën: Këshilli i Lartë i Prokurorisë, Rruga “Ana Komnena”, Godina “Poli i Drejtësisë”, Tiranë
