TIRANË– Në GJKKO, po mbahet seanca e radhës e gjyqit të Ilir Metës e Monika, të akuzuar për korrupsion, pastrim parash e fshehje pasurie. Kreu i Partisë së Lirisë, Meta nuk do të përfaqësohet me nga avokati Kujtim Cakrani por mbrojtësi i tij i ri do të jetë Bujar Musta, ish-gjyqtar i shkarkuar nga vettingu për probleme me pasurinë.
Vetë ish-presidenti është i pranishëm në seancë, ku pretendoi se nuk i janë vënë në dispozicion të gjitha aktet hetimore. Gjyqtari Erion Bani, i cili tha se sekretaria e gjykatës ka ndjekur të gjitha procedurat për dorëzimin e akteve, por sipas tij mbrojtësi i mëparshëm kishte refuzuar t’i tërhiqte për shkak të pretendimeve mbi vulat e dokumenteve.
Ilir Meta: Ende nuk më janë dhënë në mënyrë shkresore e gjithë përmbajtja e dosjes hetimore. E kam theksuar në të gjitha seancat paraprake dhe në themel. Sa më shpeht të hetë e mundur duhet të njihemi me çdo akt që të bëjmë mbrojtje efektive.
Erion Bani: nga shkresat e sekretarisë janë bërë të gjitha procedurat për dhënien e këtyre akteve, ka kohë që janë bërë por mbrojtësi juaj refuzoi ti marrë me pretendimin “vulë e madhe e vulë e vogël”. I kemi bërë konform të gjitha rregullave si për çdo të pandehur. Mund të paraqitet avokati juaj në sekretari ti marrë ose të bëjë kërkesë që t’ia dërgojmë në paraburgim.
Avokati Bujar Musta: Nuk isha në dijeni për këtë pretendim, pas seancës do paraqitem menjëherë të tërheq aktet.
Më pas, mbrojtja paraqiti kërkesat paraprake duke kërkuar pavlefshmëri dhe papërdorshmëri të të gjitha provave të administruara nga SPAK. Avokati kërkoi që të mos përdoret si provë SMS-ja e pretenduar mes Ilir Metës dhe biznesmenit Kastriot Ismailaj në çështjen CEZ-DIA, ku përmendet një shumë prej 200 mijë eurosh, duke pretenduar se nuk është provuar autenticiteti i saj.
“Të mos përdoren si prova mesazhet me Kastriot Ismailajn nga kjo kartë. Meqënëse ky mesazh nuk përbën provë. Të asgjësohen. Nëse ky mesazh lejohet të përdoret si provë kunderr Metës, atëherë cenohet e drejta për proces të rregullt ligjor dhe do ngrihen pretendime për diskriminim për arsye politike. Nëse do rrëzohet kërkesa ime, atëherë të behet ekspertim për mesazhin se nuk është i vërtetë dhe përbën montazh. Provohet se ky mesazh ka paqartësi në përmbajtje dhe është i pakuptueshëm”, tha avokati.
“Interpretimi që ka bërë prokurori nuk ka asnjë lidhje. Asnjë lloj prove, kjo SMS nuk është dërguar prej meje nga karta ime drejtuar kartës së Kastriot Ismailajt. Të verifikohet nëse është dërguar nga karta ime e celularit”, tha Ilir Meta.
Po ashtu, mbrojtja kërkoi të mos përdoren si prova dëshmitë e Dritan Priftit dhe Ervis Matajt dhe intervista e Vjollca Ismailajt.
Avokati kërkoi gjithashtu kryerjen e një ekspertimi të ri financiar, ose thirrjen në gjykatë të ekspertes që ka hartuar aktin e ekspertimit, duke kundërshtuar analizën financiare të përdorur nga SPAK për të ngritur akuzat ndaj Metës.
Read more:Gjyqi me Ols Dadon/ Erion Veliaj mbërrin në Gjykatën Administrative (VIDEO)
Në seancën e fundit, mbrojtja e Metës shpalosi edhe një listeprej 134 emrash që kërkon të thirren dëshmitarë mes të cilëve Kryeministrin Rama, ish deputetë, ish bashkëpunëtorë të tij në Lëvizjen Socialiste për Integrim dhe disa shtetas të huaj të lidhur me çështjet e CEZ-DIA dhe lobimin, përfshirë Charles McGonigal. SPAK kërkon pyetjen e 110 dëshmitarëve. Sot është radha e Kryemadhit, më pas vendos GJKKO për listën gati rekord të personave që pritet të pyeten.
Kliko këtu për të lexuar dokumentin e plotë
Lajm në përditësim…
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
Gjyqi në GJKKO/ Kryemadhi kërkon pavlefshmëri të provave të marra nga celulari i saj: Isha deputete, SPAK s’mund të bënte kontroll në banesën time
Edhe mbrojtja e Monika Kryemadhit paraqiti kërkesat paraprake në GJKKO, duke kundërshtuar një pjesë të provave të administruara nga SPAK. Avokatët kërkuan shpalljen e pavlefshmërisë dhe papërdorshmërisë së provave të nxjerra nga telefoni i Kryemadhit. Kjo e fundit tha se SPAK pretendon se telefoni nuk është i saj, por i nënës Fatime Kryemadhi. Ish-deputetja shtoi me ironi që atëherë të vijë dhe të japë llogari nëna e saj për mesazhet me Vali Bizhgen, Albana Shtyllën, Engjëll Agaçin etj.
Kryemadhi insistoi se SPAK nuk mund të ushtronte kontrolle në banesën ku ajo jetonte me të emën, pasi ishte deputete.
Redi Llanaj, avokat i Kryemadhit: 3 herë SPAK tha se nuk ka korrupsion me biznesmenin për çështjen e banesës, por sqaroi se ka marrëdhënie korruptive. Marrëdhënia miqësore konsiderohet nga organi procedues marrëdhënie korruptive. Sqarojmë se të pandehurit e kanë pranuar edhe vetë që kanë miqësi, marrëdhënie njohjeje të hershme miqësore. Janë lënë disa detyra nga gjyqtari i seancës paraprake për moskoherencën e hetimit. Mendoj se nuk janë gabime, por paragjykime. Ligjërisht, kërkesa është shkruar nga 3 prokurorë; de facto është vetëm një prokuror, Altin Dumani. Drejtues ishte edhe Arben Kraja, por Arben Kraja është Arben Kraja, nuk u përdor si vegël.
Ndërhyn gjykata për prishje të solemnitetit dhe shkelje etike.
Llanaj:“Vegël” s’është gjuhë fyese, është instrument, nënkupton një instrument. Është e qartë, këtu ka një çështje politike, ndaj mbrojtësi përdori fjalën “vegël”. Kemi qenë, që nga fillimi i procedimit, të gatshëm. Kemi kontestim për aktet dhe pajisjet elektronike të gjetura në banesën e Kryemadhit. Është ushtruar kontroll dhe janë gjetur 6 telefona, ndërsa për 1 telefon është thënë se është i Kryemadhit.
U mor ky telefon, u ekstraktuan të dhënat dhe u nxorën ato materiale që janë pjesë e procedimit, duke i nxjerrë nga konteksti të dhënat. Kërkojmë papërdorshmërinë absolute të të gjitha të dhënave të ekstraktuara nga telefoni i Kryemadhit. Të bëhet një ekspertim dhe të bëhet krahasim me materialet që janë nxjerrë nga konteksti.
Kryemadhi:Doja të filloja me një kërkesë paraprake për pavlefshmërinë dhe papërdorshmërinë e të dhënave të telefonit. Kam bërë kërkesë, por ma kanë rrëzuar kërkesën për kthimin e sendeve dhe të telefonit. Gjyqtari e ka rrëzuar kërkesën me argumentin se telefoni nuk është i imi. Kështu e ka rrëzuar edhe Apeli.
Dhe prokuroria pretendonte se nuk është i imi, sepse është gjetur në banesën e Fatime Kryemadhit. Në momentin kur telefoni u ekspertua, në vitin 2023, unë isha deputete dhe organi i akuzës nuk mund të vinte për të bërë kontroll.
Organi i akuzës e dinte shumë mirë që jetonim në një shtëpi. E di shumë mirë që kontrolloi dhomën time të gjumit, edhe pse në hipotekë ishte e Fatimes. Në këto vendime thuhet se telefoni nuk është i imi, ndërsa 190 faqe të akuzës bazohen në këto mesazhe. Nëse është i Fatime Kryemadhit, të vijë ajo të sqarojë mesazhet me Vali Bizhgen, Albana Shtyllën, Engjëll Agaçin etj.
VIDEOLAJM/ ‘Është një ditë e mrekullueshme’, bluza e veçantë që zgjodhi Kryemadhi për të shkuar në gjyq
Monika Kryemadhi është paraqitur ditën e sotme në Gjykatën e Posaçme, teksa kishte veshur një bluzë ku lexohej ‘It’s a wonderful day’, pra e përkthyer në shqip, ‘është një ditë e mrekullueshme’.
Në GJKKO sot do të zhvillohet seanca e radhës e gjyqit të Ilir Metës dhe Monika Kryemadhit për dosjen ku ata akuzohen për korrupsion, pastrim parash e fshehje pasurie.
‘Divorci’ me Kujtim Cakranin, Bujar Musta do të jetë avokati i ri i ish-Presidentit Ilir Meta
Bujar Musta do të jetë avokati i ri i ish-Presidentit Ilir Meta, pas ‘divorcit’ të kreut të Partisë së Lirisë me avokatin Kujtim Cakrani.
Avokati Musta u paraqit ditën e sotme në GJKKO, ku do të mbahet seanca e radhës e gjyqit të Ilir Metës e Monika Kryemadhit për dosjen ku ata akuzohen për korrupsion, pastrim parash e fshehje pasurie.
Musta ka qenë gjyqtar në Gjykatën e Elbasanit, i shkarkuar nga procesi i vettingut në sistemin e Drejtësisë. Ndërkohë edhe vetë Ilir Meta ka deklaruar në Gjykatë se avokati i tij do të jetë Bujar Musta, ndërkohë që ish-Presidenti ka revokuar prokurën për Kujtim Cakranin.
