Më 30 qershor, autobusi i linjës së Beratit për në Tiranë, u përmbys në autostradë në hyrje të kryeqytetit duke lënë të vdekur në vend shoferin, ndërsa 12 pasagjerë u dëmtuan rëndë.
Vetëm gjatë qershorit sipas shifrave të INSTAT, kanë ndodhur 132 aksidente rrugore, 25 më shumë se në të njëjtin muaj të vitit të kaluar, ku ishin regjistruar 107 ngjarje. Paralelisht u rrit edhe numri i personave të aksidentuar, të vdekur ose të plagosur, nga 140 në 186, ose rreth 33% më shumë.
Përgjegjësinë kryesore e mbajnë shoferët, me 93.9% të aksidenteve në qershorit si pasojë e sjelljes së drejtuesve, (kundrejt 92.5% në qershor 2025). Ndryshe nga qershori i 2025-ës, ku grupmosha që shkaktonte më shumë aksidente, ishte 25-34 vjeç me 27.1% të rasteve, në qershor të këtij viti, vendin e parë e zënë mosha 35-44 vjeç, me 28% të totalit.
Numri më i madh i përplasjeve në qershor 2026 u regjistrua të martave. Intervali kohor më problematik mbetet nga ora 19:00 deri në 24:00, kur ndodh rreth një e katërta e aksidenteve.
Sa u përket qarqeve, Tirana mbetet zona me numrin më të lartë, nga 25 aksidente në qershor 2025 në 42 në qershor 2026, ndërsa numri i të aksidentuarve u rrit nga 30 në 55. Rritje të fortë shënoi edhe Durrësi, ku aksidentet u rritën nga 8 në 21 dhe të aksidentuarit nga 15 në 24. Në rritje janë edhe Vlora dhe Fieri. Ulje regjistruan Korça, Lezha, Gjirokastra dhe Elbasani.
Read more:Kukësi, Gjirokastra dhe Elbasani me rënien më të fortë të punësimit në 2025
Edhe bilanci i 6 muajve të këtij viti konfirmon se rënia graduale që aksidentet rrugore ndjenin në vitet e fundit, është përmbysur.
Në periudhën janar-qershor 2026 u regjistruan 679 aksidente, 43 më shumë se në të njëjtën periudhë të vitit 2025, duke shënuar rritje prej 6.8%. Numri i të aksidentuarve në këto 6 muaj, u rrit nga 883 në 952 persona.
