Deputeti i Partisë Demokratike dhe nënkryetari i Komisionit për Punët e Brendshme dhe Sigurinë Kombëtare, Klevis Balliu, hodhi akuza të forta ndaj kryeministrit Edi Rama dhe zyrtarëve të lartë të qeverisë, duke deklaruar se Shqipëria nuk përballet më me raste të izoluara korrupsioni, por me një shtet të kapur ku, sipas tij, pushteti politik, interesat private dhe krimi i organizuar funksionojnë si një mekanizëm i vetëm.
Sipas Balliut, në qendër të kësaj skeme qëndrojnë Edi Rama, Ergys Agasi, Belinda Balluku dhe Ron Yefet, të cilët, sipas tij, përfaqësojnë një model qeverisjeje ku korrupsioni, pandëshkueshmëria dhe kapja e institucioneve ecin krah për krah.
Read more:LIVE- “O milet, Rama ka siklet!”, protestuesit marshojnë te sheshi Willson: Dorëheqje!
Duke u ndalur te afera e AKSHI-t, Balliu deklaroi se institucioni është shndërruar në qendrën operative të kapjes së shtetit, duke pretenduar se përmes tij janë vënë nën kontroll institucione kyçe dhe janë përdorur mekanizma shantazhi e intimidimi ndaj administratës publike. Ai shtoi se skema, sipas tij, shtrihet edhe te përdorimi i sistemit TIMS, pengmarrjet e biznesmenëve dhe zyrtarëve, si edhe te persona të afërt me familjen e Kryeministrit.
Balliu akuzoi gjithashtu SPAK-un se ka dështuar të godasë drejtuesit politikë të kësaj afere, duke theksuar se arrestimi i Ermal Beqirit në Francë tregoi, sipas tij, paaftësinë e institucioneve shqiptare për të vepruar. Ai deklaroi se nuk mund të ketë hetim të plotë pa u marrë në pyetje Kryeministri Edi Rama, pa u hetuar pasuria e tij dhe pa u sekuestruar pajisjet e komunikimit.
Deputeti i PD-së kërkoi që hetimet pasurore të shtrihen ndaj një liste zyrtarësh dhe personash të përmendur në dosjen e AKSHI-t, mes tyre Edi Rama, Belinda Balluku, Ergys Agasi, Armand Frangu, Gentian Likaj, Gerond Meçe, Mirlinda Karçanaj, Daniel Shima, Hava Delibashi, Altin Jani, Elira Kokona, Gjergji Taho, Igli Tafa, Kreshnik Tërnova dhe Fiorent Zguro. Ai kërkoi gjithashtu hetime për çështjen “Durana”, lejet e kullave, Ilir Prodën, Neritan Nallbatin dhe lidhjet me grupet kriminale në Tiranë, Durrës dhe Elbasan.
Balliu u ndal edhe te ajo që e cilësoi si skema KAYO, për të cilën tha se e ka denoncuar prej muajsh në Parlament dhe në Komisionin e Sigurisë. Sipas tij, Belinda Balluku dhe Ron Yefet kanë vendosur nën kontroll një pjesë strategjike të industrisë ushtarake shqiptare përmes kompanive që prodhojnë, furnizojnë dhe tregtojnë armë, municione dhe pajisje ushtarake.
Sipas Balliut, Ron Yefet bleu një pjesë kompanie për vetëm 490 euro dhe më pas, përmes bashkimeve të kompanive dhe vendimeve të firmosura nga Belinda Balluku, arriti të kontrollojë kompani të industrisë së mbrojtjes që kanë përfituar kontrata publike me vlerë miliona euro. Ai e cilësoi këtë jo vetëm si një rast korrupsioni, por si një cenim të drejtpërdrejtë të sigurisë kombëtare.
Read more:Abuzimet me tenderët e AKSHI-t, biznesmeni Ermal Beqiraj arrestohet në Francë! Pritet ekstradimi
Në përfundim, Balliu bëri të ditur se, në cilësinë e nënkryetarit të Komisionit për Punët e Brendshme, ka kërkuar ngritjen e një Komisioni Hetimor Parlamentar për aferën e AKSHI-t dhe paralajmëroi se opozita do ta ndjekë këtë kërkesë deri në Gjykatën Kushtetuese, duke theksuar se “siguria kombëtare nuk mund të administrohet si pronë private e pushtetit dhe shteti nuk mund të dorëzohet në duart e korrupsionit”.
