Bashkimi Evropian ka paralajmëruar se vonesat në funksionalizimin e institucioneve të Kosovës mund të ndikojnë në përfitimin e vendit nga fondet e Planit të Rritjes për Ballkanin Perëndimor.
Në një përgjigje për RTV21, një zëdhënës i Komisionit Evropian ka bërë thirrje për një dialog efikas ndërpartiak dhe për arritjen e një qëllimi të përbashkët, në mënyrë që Kosova të mund të zbatojë reformat e kërkuara dhe të përfitojë nga mbështetja financiare e BE-së.
Paralajmërimi vjen në një kohë kur Kosova po përballet me një bllokadë institucionale, pas dështimit të konstituimit të Kuvendit dhe zgjedhjes së presidentit të ri.
“BE-ja u ka bërë vazhdimisht thirrje të gjithë aktorëve politikë që të sigurojnë stabilitet institucional. Është thelbësore që institucionet e Kosovës të konstituohen pa vonesa të mëtejshme, në përputhje me kornizën kushtetuese dhe procedurat e përcaktuara”, ka deklaruar zëdhënësi i Komisionit Evropian.
Sipas tij, zvarritja e formimit të institucioneve mund të pengojë reformat e rëndësishme dhe të ndikojë në aftësinë e Kosovës për të përfituar plotësisht nga mundësitë e ofruara nga BE-ja, përfshirë fondet e Planit të Rritjes.
“Prandaj, arritja e shpejtë e një marrëveshjeje ndërmjet partive politike për një kandidat konsensual për president është veçanërisht e rëndësishme. Vetëm një dialog efikas ndërpartiak dhe një qëllim i përbashkët do t’i mundësojnë Kosovës të ndjekë objektivat e përbashkëta dhe të zbatojë reformat që kërkojnë qytetarët e saj”, thuhet në përgjigjen e BE-së.
Read more:Porti i Vlorës në kulmin e sezonit, rreth 2700 pasagjerë mbërrijnë sot me tre tragete nga Brindisi
Kosova rrezikon financimin
Kosova rrezikon të humbasë një pjesë të financimit nga Instrumenti për Reforma dhe Rritje, për shkak të vonesave në përmbushjen e reformave të përcaktuara.
Institucionet e Kosovës kanë bërë kërkesën e parë për disbursimin e fondeve më 15 korrik 2026, ndërsa Komisioni Evropian aktualisht është duke vlerësuar raportimin për hapat e ndërmarrë në kuadër të reformave.
Megjithatë, situata politike dhe vonesat në zbatimin e reformave kanë ngritur pikëpyetje mbi mundësinë e përfitimit të plotë të këtyre fondeve.
Kërkesa e institucioneve të Kosovës lidhet me një sërë objektivash dhe reformash që fillimisht duhej të përmbusheshin në dhjetor 2024, qershor 2025 dhe qershor 2026.
Në këtë situatë, BE-ja kërkon që institucionet e Kosovës të funksionalizohen sa më shpejt, duke e konsideruar stabilitetin politik dhe zbatimin e reformave si kushte kyçe për përfitimin e mbështetjes financiare evropiane.




