Kryetari i PD-së, Sali Berisha ka reaguar në lidhje me protestat e banorëve të zonës Naftëmbajtëse të Marinës sa i takon mos respektimit të kontratave të qirave të tokave nga ana e Bankers Petrolium.
Ai tha se Bankers duhet t’i dëmshpërblejë për çdo dëm dhe detyrim banorët.
“Mendoj se banorët kanë absolutisht të drejtë dhe Bankers duhet të zhdëmtojë për të gjitha pasojat e krijuara nga metodat teknologjike që përdoren për nxjerrjen e naftës në atë zonë.
Së dyti, nuk dua të përhap panik tek banorët, por disa studime tregojnë se aty ka një rritje të ndjeshme të të sëmurëve me kancer. Dhe ata janë njerëz të pambrojtur, pa shtet, se çdo vend të botës, studimi do zyrtarizohej dhe do bëhej përgjegjës cilido për rritjen, siç thuhet, këto janë studime, por askush nuk mund t’i hedhë poshtë pa një studim serioz. Ndaj dhe banorët e asaj zone, që është fusha e naftës më e madhe në Evropë në tokë, meritojnë dëmshpërblim të plotë. Meritojnë ligjërisht një kontroll shëndetësor shumë serioz dhe mbështetje kundër pasojave që mund të jenë krijuar në atë zonë nga gazrat dhe probleme të tjera.”, tha ai.
