Turizmi po shton konsumin në muajt e verës, ndërtimi po gjeneron të ardhura përmes taksave dhe rritja e të ardhurave personale po ushqen më tej shpenzimet.
Kjo është panorama që na ofron realizimi i të ardhurave dhe shpenzimeve për 7 muajt e vitit.
Ministria e Financave bën të ditur se arkës së shtetit i janë shtuar 511 milionë euro më shumë nga janari-korrik, por pas kësaj shifre rekord fshihet më shumë se një rritje e të ardhurave buxhetore, duke bërë që të ardhurat të arrijnë në 484.6 miliardë lekë, 11.8% më shumë se një vit më parë.
Të ardhurat tatimore, si të ardhurat nga TVSH-ja neto në vend, tatimi mbi fitimin, tatimi mbi të ardhurat personale dhe taksat nacionale, u realizuan në shumën 165.9 miliardë lekë, 15.7 miliardë lekë ose 10.4% më shumë se 7-mujori i vitit 2025. Dhe është konsumi një nga sektorët ku po gjenerohen më shumë të ardhura.
Ndalur te TVSH-ja neto, në kulmin e sezonit veror ky zë jep më shumë të ardhura, teksa arriti në 49 miliardë lekë, rreth 106 milionë euro më shumë, apo 25.1% më shumë se në të njëjtën periudhë të vitit të kaluar. Më shumë turistë do të thotë më shumë shpenzime për hotele, restorante, transport, tregti dhe shërbime. Vetëm në korrik, TVSH-ja e arkëtuar arriti në 22.7 miliardë lekë, niveli më i lartë për këtë muaj krahasuar me vitet e mëparshme.
Por turizmi nuk është i vetmi motor i arkëtimeve.
Rreth një e treta e rritjes së të ardhurave totale, sipas të dhënave të Ministrisë së Financave, lidhet me taksat vendore, kryesisht me taksën e ndikimit në infrastrukturë nga ndërtimet e reja. Vetëm ky zë ka dhënë rreth 16 miliardë lekë më shumë në rritjen e arkëtimeve.
Edhe të ardhurat nga tatimi mbi të ardhurat personale janë rritur me 17.3%, ndërsa fondet speciale, ku përfshihen sigurimet shoqërore dhe shëndetësore, janë rritur me 13.4%.
Ndalur te shpenzimet e përgjithshme publike, për periudhën janar-korrik 2026, ato arritën në rreth 433.2 miliardë lekë, me një realizim në masën 98.2% të planit të periudhës.
Në një total prej 484.6 miliardë lekë të ardhurash dhe shpenzime prej 433.2 miliardë lekësh, suficiti ka arritur në 51.4 miliardë lekë, apo, thënë ndryshe, 511 milionë euro.
