Për të katërtën natë radhazi, qytetarë nga qytete të ndryshme të Kosovës janë mbledhur në sheshin “Skënderbeu” në Prishtinë, duke protestuar kundër vendimit të Dhomave të Specializuara në Hagë për katër ish-drejtuesit e UÇK-së.
Tubimi i mbrëmjes së sotme ka mbledhur një numër të madh pjesëmarrësish, të cilët kanë shprehur kundërshtimin ndaj aktgjykimit për Hashim Thaçin, Kadri Veselin, Rexhep Selimin dhe Jakup Krasniqin.
Një prej organizatorëve të protestave, Çlirim Haziri, ka deklaruar se tubimet do të vijojnë edhe në ditët në vazhdim. Sipas tij, protesta do të vazhdojë deri në realizimin e kërkesave të organizatorëve për drejtësi ndaj ish-pjesëtarëve të UÇK-së.
Reagimet ndaj vendimit të Hagës nuk janë kufizuar vetëm në Kosovë. Gjatë ditës, protesta janë zhvilluar edhe në diasporë, përfshirë Zvicrën dhe Gjermaninë.
Ndërkohë, tubime të tjera janë paralajmëruar edhe në Shtetet e Bashkuara të Amerikës, përfshirë një protestë pranë selisë së Organizatës së Kombeve të Bashkuara në New York.
Aktgjykimi ndaj Hashim Thaçit, Kadri Veselit, Rexhep Selimit dhe Jakup Krasniqit u shpall më 16 shtator. Vendimi ka shkaktuar reagime të shumta në Kosovë dhe në komunitetet shqiptare jashtë vendit, me protesta të organizuara në disa qytete.
