Raportuesi i Shqipërisë në Parlamentin Europian, Andreas Schieder, ka vlerësuar progresin e vendit në procesin e integrimit europian, duke theksuar se Shqipëria ndodhet në një fazë të avancuar të negociatave me Bashkimin Europian. Në fjalën e tij në Konferencën Ndërparlamentare “Agjenda strategjike për zgjerimin e BE-së dhe anëtarësimin e Shqipërisë”, që po zhvillohet në Tiranë, Schieder u shpreh se dëshiron të japë kontributin e tij për përmbylljen e këtij procesi. Konferenca mbledh përfaqësues të institucioneve shqiptare, Parlamentit Europian dhe parlamenteve të vendeve të tjera europiane.
“Shqipëria është një vend i bukur, me det dhe male. Dua të jap kontributin tim për të finalizuar këtë moment historik”, u shpreh Schieder. Ai tha se, edhe pse procesi mund të ketë zgjatur, ajo që ka rëndësi është objektivi dhe ritmi i reformave. Sipas tij, Shqipëria duhet ta shfrytëzojë këtë vrull për të avancuar drejt anëtarësimit në BE. “Shqipëria është pararendëse e Ballkanit Perëndimor për t’u integruar në BE”, tha raportuesi europian, duke iu referuar edhe vlerësimeve të komisioneres për Zgjerimin, Marta Kos. Schieder u ndal edhe te raporti i këtij viti për Shqipërinë, duke theksuar se ai është miratuar me vullnet dhe se procesi duhet të shoqërohet me vëmendje ndaj të gjitha fushave të reformave.
“Duhet të shohim të gjitha çështjet, shtetin e së drejtës, ku Shqipëria ndërmori procesin e vettingut”, tha ai, duke përmendur gjithashtu sistemet sociale, sistemin shëndetësor dhe politikën e jashtme, ku sipas tij Shqipëria është në përputhje me qëndrimet e BE-së. Raportuesi për Shqipërinë theksoi se tashmë vendi ndodhet në fazën e fundit të procesit dhe se mbeten ende disa kapituj për t’u përmbyllur. “Kryenegociatori është me ne këtu, tani ndodhemi në fazën e fundit të garës. Ka ende disa kapituj që duhen mbyllur. Shqipëria ka qenë eprore”, u shpreh Schieder.
Read more:Temperatura deri në 32 gradë celcius…parashikimi i motit për sot (VIDEO)
Sipas tij, fokusi nuk duhet të jetë vetëm te hapja e kapitujve, por te përfundimi i tyre dhe zbatimi i reformave në praktikë. “Nuk është çështja që të hapen kapitujt, por duhen mbyllur. Këto reforma duhet të mbërrijnë te shoqëria. Duhet të formësohet e ardhmja e vendit”, deklaroi ai. Schieder shtoi se Shqipëria ka ende kohë për të përmbushur hapat e mbetur dhe se procesi nuk varet vetëm nga puna e institucioneve shqiptare, por edhe nga mënyra se si Bashkimi Europian do ta trajtojë zgjerimin. “Shqipëria meriton që të jetë anëtare e BE-së. Kemi parë që Shqipëria dhe Kuvendi e kanë ndërmarrë këtë sfidë mjaft të fortë, por në fund fare është çështje e BE-së se si e trajton. Nuk është thjesht çështje e Brukselit dhe e Shqipërisë”, përfundoi raportuesi europian.
