Ish-mbrojtësi i Juventus, Leonardo Bonucci, ka ndarë vlerësimin e tij për sezonin aktual të “Zonjës së Vjetër”, duke u shprehur optimist për përfundimin e kampionatit.
Pas një periudhe të paqëndrueshme, Juventusi duket se ka gjetur ritmin e duhur, duke regjistruar pesë fitore në shtatë ndeshjet e fundit. Sipas Bonuccit, forma në rritje mund t’i çojë bardhezinjtë edhe drejt vendit të dytë në renditje.
“Vendi i dytë? Duke marrë parasysh ndeshjen e së dielës, pse jo? Juventusi, falë punës së bërë nga trajneri Luciano Spalletti dhe ekipi, po arrin rezultate të rëndësishme”, u shpreh ai.
Bonucci theksoi rolin kyç të Spallettit në rikthimin e stabilitetit dhe mentalitetit fitues te skuadra, duke e cilësuar atë si faktor vendimtar në përmirësimin e rezultateve. Sipas tij, eksperienca dhe njohuritë taktike të trajnerit kanë ndikuar drejtpërdrejt në transformimin e ekipit.
“Ai është njeriu i duhur në kohën e duhur. Di të menaxhojë presionin dhe polemikat, ndërsa ka një kuptim shumë të thellë taktik”, shtoi Bonucci, duke zbuluar se ka pasur edhe biseda të fundit me trajnerin italian.
Ish-mbrojtësi beson se objektivi kryesor i Juventusit mbetet sigurimi i një vendi në Ligën e Kampionëve, ndërsa skuadra aktualisht gëzon një avantazh prej pesë pikësh ndaj rivalëve të drejtpërdrejtë për një vend në katërshen e parë.
Forma në rritje dhe stabiliteti i rikthyer e bëjnë Juventusin një kandidat serioz për një përfundim të fortë të sezonit në Serie A. /Telegrafi/
