Art, kulturë dhe spektakël. Rubrika “Ciceron”, ju njeh me aktivitetet që mund të ndiqni sot dhe nesër në Tiranë dhe disa qytete të vendit.
1.“SI NE TË DY”, KOMEDIA E ZEZË, PREMIERË NË TEATRIN KOMBËTAR
“Si ne të dy” është komedia e zezë me regji nga Violeta Trebicka, që do të vijë premierë në skenën e Teatrit Kombëtar pranë ArTurbinës më 22 prill në orën 20:00. Shfaqja ka në qendër një çift, i cili përballet me shpërbërjen e martesës së tyre, interpretuar nga aktorët Luiza Xhuvani dhe Alfred Trebicka.
2. “IMPULS”, KONCERT NGA ORKESTRA FRYMORE NË QYTETIN E DURRËSIT
“Impuls” koncerti nga Orkestra Frymore në Durrës me drejtues orkestre| Saimir Kalaja dhe drejtuese artistike Olta Juba, do të vijë në Sallën e Koncerteve të Qendrës Kulturore të Fëmijëve në Durrës mbrëmjen e nesërme në orën 19:00.
3. “ZËRAT E TOKËS”, SHFAQJE NË TEATRIN E HAPUR “MIRUSH KABASHI”
“Zërat e tokës”, një shfaqje që bashkon teatrin, muzikën, koreografinë dhe akrobacinë në një përvojë të paharrueshme do të shfaqet në kuadër të Ditës Ndërkombëtare të Tokës më 22 prill në orën 19:30 në teatrin e hapur “Mirush Kabashi” në Parkun e Madh të Liqenit.
4.KONCERT GALA/ “TRE TENORËT SPANJOLLË” NË SKENËN E TKOB-IT
“Tre tenorët spanjollë” koncert gala në Teatrin Kombëtar të Operës dhe Baletit vjen sonte në orën 19:00 me tenorët Ignacio Encinas, Oscar Encinas dhe Albert Deprius. Të ftuar edhe artistët shqiptarë, Ramona Tullumani, Denis Skura e Ekland Hasa, të cilët do të interpretojnë të shoqëruar nga Orkestra Simfonike e Forcave të Armatosura nën dirigjimin e Leonardo Quadrini.
5. FESTIVALI NDËRKOMBËTAR I FILMIT TË STUDENTËVE NË TIRANË
Në Universitetin e Arteve në Tiranë organizohet për herë të parë Festivali Ndërkombëtar i Filmit të Studentëve në Tiranë (International Student Film Festival in Tirana). Festivali do të çelet mbrëmjen e sotme në orën 19:00.
6. “MAMMA MIA”, MUSICALI I NJOHUR, SHFAQJE NGA STUDENTËT
Një ndër shfaqjet më të dashura të repertorit modern, musicali “Mamma Mia” do të shfaqet nesër në ora 20.00 në Sallën e Koncerteve të Universitetit të Arteve. Shfaqja është një produksion i studentëve të Fakultetit të Muzikës, nën drejtimin artistik të artistes dhe pedagoges Manjola Nallbani.
7. PANAIRI MBARËKOMBËTAR I LIBRIT AKADEMIK E SHKENCOR NË TIRANË
Nga nesër deri më 24 prill në Akademinë e Shkencave mbahet Panairi Mbarëkombëtar i Librit Akademik dhe Shkencor me qëllim promovimin e botimeve dhe lehtësimin e qasjes së lexuesit ndaj librit akademik dhe shkencor.
8. “JO TOKË E THJESHTË”, EKSPOZITA E STUDENTËVE TË MULTIMEDIAS
“Jo Tokë e Thjeshtë” është ekspozita e studentëve të Atelierit të Multimedias në Universitetin e Arteve, në galerinë FAB. Në të prezantohen deri më 30 prill akte eksperimentale, shumëllojshmëri mediumesh dhe qëndrimesh artistike.
9. “MUZË E SHPIRTIT TË LIRË”, KONCERT NË TEATRIN “SKAMPA”
“Muzë e Shpirtit të Lirë” është koncerti që do të mbahet nesër në orën 19:00 në teatrin “Skampa” në Elbasan. Interpetojnë Matilda Bajrami në flaut, Xhovana Marku në oboe dhe Ardita Bufaj në piano.
