Polarizimi i arenës politikë në Shqipëri nga Sali Berisha dhe Edi Rama ishte çështja që shkaktoi përplasje të ashpër verbale mes Alesia Balliut dhe Fatmir Merkoçit në emisionin “Studio Live” me Ermal Qorin në Report Tv.
Merkoçi akuzoi Balliun, e cila kërkon të garojë për kryetare të Partisë Demokraike, se antagonizmi ndaj Berishës është i vonuar dhe jo i sinqertë, pasi demokratja nuk ka kundërshtuar më herët gabimet politike të lidershipit brenda partisë dhe jo vetëm.
Alesia Balliu:Unë kam thënë shumë gjëra. Fakti që nuk i keni dëgjuar do të thotë se keni mbushur veshët ose i keni mbyllur sepse kështu ju intereson.
Fatmir Merkoçi:Meqë ju ke thënë kaq shumë gjëra demokratëve, na thuaj një gjë. Unë dua të di çfarë kërkon ti.
Alesia Balliu: Unë kërkoj riformatim të Partisë Demokratike, ndalimin e garimit të Sali Berishës si kryetar, padiskutim konform statutit që ne vetë e kemi miratuar.
Debati mes Balliut dhe Merkoçit degradoi në fyerje dhe sulme personale.
Alesia Balliu:Jeni iluzionar
Fatmir Merkoçi: Ti nuk di se çfarë flet.
Alesia Balliu:Ti po të kishte zgjidhje do e kishe dhënë. Nuk do ishe akoma 20 vite nëpër studio televizive. Do kishe bërë zgjidhje konkrete. Nuk do bëje gam gam këtu. 35 vite gam gam.
Për Merkoçin, Balliu nuk ka kohën e nevojshme për të denoncuar në gjykatë shkeljet statutore brenda Partisë Demokratike.
Fatmir Merkoçi: Para zgjedhjeve nuk ke kohë.
Alesia Balliu:Nuk ma tregoni ju a s’kam kohë. Nuk keni kompetencë ka vendimmarrje ligjore këtu, nuk je askushi. Ti ke 30 vite kontribut politik dhe nuk ke bërë asgjë.
Fatmir Merkoçi:Dhe ke bërë ti. Ti nuk bëre asgjë moj.
Fatmir Merkoçi:Ti nuk di çfarë është politika. Ma thuaj çfarë është politika, mësoni politikën.
Alesia Balliu:Politikën mësojeni ju që jeni dështak 30-vjeçar. Nuk keni bërë asgjë për kombin.
Balliu, e cila synon të garojë për postin e kreut të Partisë Demokratike zotohet se do t’i shkojë deri në fund misionit për demokratizimin e PD-së.
“Kam çuar një shkresë te selia e PD, ku kam qartësuar 3 kërkesa të qarta që janë mbarimi i mandatit të Sali Berishës si kryetar i PD-së, ndalimin e Sali Berishës për kryetar në zgjedhjet e 23 majit dhe komandimin sipas statutit për sekretar të përgjithshëm, për kryetar deri në mbajtjen e zgjedhjeve.
Çdo vendimmarrje që është marrë për mua, apo për zotin Salianji, si përjashtimi apo vetëpërjashtimi, nuk kanë asnjë vlerë juridike pasi Sali Berisha është ish-kryetar i Partisë Demokratike sipas statutit që në shtator të 2025 dhe çdo vendimmarrje që është marrë pas kësaj date nuk ka asnjë vlerë ligjore.
Nëse gjykata nuk është e urdhëruar nga Rama, padiskutim që do ta ndalojë garimin e Sali Berishës për kryetar të PD sepse kështu e thotë ligji dhe procedura”,- tha Balliu ndër të tjera.
