Me sheshe gjithnjë e më bosh dhe protesta që po humbasin forcën, Sali Berisha ka gjetur një tjetër fajtor: mediat. Në daljet e tij të fundit, ai i ka quajtur mediat “mafia e zezë e fjalës së lirë”, duke pretenduar se opozita censurohet dhe nuk ka hapësirë në ekranet e kontrolluara nga Rama. Një refren që po përsëritet thuajse në çdo protestë. Por ndërsa akuzon për censurë, realiteti që tregojnë shifrat është krejt tjetër.
Monitorimi për marsin i Autoritetit të Mediave Audiovizive konfirmon se Partia Demokratike e Shqipërisë është ulur këmbëkryq në ekranet e shqiptarëve. Për muajin mars, PD zë 60.12% të kohës televizive, ndërsa Partia Socialiste e Shqipërisë renditet e dyta me thuajse gjysmën e kohës në 37.21%.
Partitë e tjera të vogla kanë një prezencë thuajse simbolike në ekranet kombëtare. Partia Republikane zë 1.66%, ndjekur nga Lëvizja Shqipëria Bëhet me 0.68%, Partia e Lirisë me 0.15% dhe Partia “Mundësia” me 0.11% Shifra këto që tregojnë se hapësira mediatike shqiptare dominohet nga dy forcat kryesore politike PD dhe PS, ndonëse dukshëm me një avantazh të theksuar për demokratët.
Read more (sali berisha):Eduard Zaloshnja: As i shkojnë, as e shikojnë, as e votojnë…
Edhe në nivel personal, kontradikta e Berishës bëhet edhe më e fortë sepse ndërsa 81 vjeçari flet për mungesë hapësire, ai vazhdon të renditet si aktori politik më i pranishme në ekranet shqiptare duke zënë 30.16% të kohës televizive.
Megjithatë, pavarësisht kësaj pranie dominuese në ekranet shqiptare, Sali Berisha nuk po arrin të përkthejë ekspozimin mediatik në mbështetje reale në terren. Të tetë protestat e tij kundër Edi Ramës janë karakterizuar nga pjesëmarrje e ulët, ndërsa retorika është bërë gjithnjë e më e ashpër, me molotovë, sulme ndaj policisë, sulme direkte ndaj mediave dhe kundërshtarëve të tij politikë brenda partisë.
Read more (Mediat):‘Kafazi është si hotel me 5 yje’/ Ndreca komenton deklaratën e Dados: Shprehje cinike dhe e papërshtatshme për një prokuror (VIDEO)
Shpresat e demokratit tani duket se janë zhvendosur te protesta e paralajmëruar për 8 majin, të cilën Berisha e cilëson si “betejë vendimtare”, njëjtë siç ka bërë edhe 8 herët e tjera.
