Paqja Fiskale u miratua në vjeshtën e 2025-ës në qeveri, duke marrë më pas dhe mbështetjen e parlamentit. Por vetëm muajin e ardhshëm ajo do të mund të nisë zbatimin.
“Janë drejt fazës finale, shumë shpejt do të dalim me aktet nën ligjore sa i përket paqes fiskal dhe fshirjes së detyrimeve. Shumë shpejt do dalim me aktet, brenda muajit maj do t’i kemi mbyllur proceset respektive”, theksoi Malaj.
Vonesa në zbatim, rrezikon pasoja për shkak të disa afateve të parashikuara për mënyrën e shlyerjes së borxheve. Kështu për detyrimet nga viti 2015 deri në 2020-ën, nëse 50% e tyre paguhet menjëherë deri në qershor 2026, gjysma tjetër falet bashkë me gjobat e kamatat.
Nëse zbatimi nis nga maji, koha në dispozicion e biznesve që duan të përfitojnë nga kjo klauzolë mbetet e shkurtër. Në rast se pagesa ndahet në disa këste dhe zgjatet deri në dhjetor 2026, falet vetëm 25 përqind e detyrimit. Por sipas ministrit vonesa e akteve nuk i cenon kushtet e vendosura në ligj.
“Sa i takon fshirjes së detyrimeve, patjetër që do bëhet siç është parashikuar në ligj, aktet nënligjore apo udhëzimet janë më tepër se si do të bëhet procedura, dhe do të përfitojnë të gjithë ato që plotësojnë kriteret”, tha Malaj
Administrata tatimore dhe ajo doganore duhet të fshijnë nga bilancet e tyre, çdo borxh të bizneseve, të krijuar përpara 31 dhjetorit të vitit 2014. Bëhet fjalë për rreth 1 miliardë euro. Kurse për borxhet nga 1 janari 2020 e deri në fund të dhjetorit 2024, falen gjoba dhe kamata nëse paguhet detyrimi tatimor brenda vitit 2026.
Ligji nuk prek, detyrimet tatimore të krijuar nga 2025-a, e tutje. Nga kjo nismë preken gati 2.1 miliardë euro detyrime të papaguara në dekada, dhe përfitojnë më shumë se 200 mijë biznese debitorë.
Read more (Biznesi):Cili vend në Evropë ka më shumë qendra të të dhënave që nxisin bumin e inteligjencës artificiale?
Kurse ligji për “Marrëveshjen e Paqes Fiskale”, parashikon lidhjen e një marrëveshje mes bizneseve të mëdha dhe tatimeve për të negociuar fitimin.
Konkretisht mbi fitimin e deklaruar të një biznesi gjatë 2025-ës, do të shtohet një marzh 18% në këtë vit, dhe çdo fitim që kalon pragun 18% do të tatohet me 5%.
Gjithashtu përmes ligjit iu jepet mundësi bizneseve të korrigjojnë pasqyrat financiare të 3 viteve të fundit, duke rritur deklarimin e të ardhurave kundrejt një tatimi prej vetëm 5%.
Të dyja nismat hasën në kritika si nga FMN dhe nga Komisioni Evropian, por ministri siguroi se aktet u bën në negocim me ta.
“Kemi diskutuar dhe negociuar me ndërkombëtarët për aktet nën ligjore”, theksoi Malaj.
