Në përvjetorin e masakrës në Nabërgjan të Pejës, sot janë kujtuar 31 civilët e pafajshëm të vrarë gjatë vitit 1999.
Kryeministri në detyrë i Kosovës, Albin Kurti, tha se viktimat – burra, gra dhe fëmijë, nga mosha 13 deri në 95 vjeç – ishin të pambrojtur dhe të paarmatosur, dhe u vranë “vetëm pse ishin shqiptarë dhe donin të jetonin të lirë në tokën e tyre”.
Ai ka theksuar se krimi u krye nga makineria shtetërore ushtarake e policore, e ideuar dhe e planifikuar në Beograd nga regjimi i Sllobodan Millosheviqit, me synim shfarosjen e popullit shqiptar, por sipas tij plani i tyre gjenocidal dështoi.
Read more (Albin kurti):Molliqaj: Faji për zgjedhjet është i Kurtit, Kosova s’ka opozitë – PSD synon Kuvendin
“Bashkë me aleatët perëndimorë, Kosova e fitoi luftën dhe u çlirua. Ne po jetojmë në paqe e Republika jonë po zhvillohet e po përparon çdo ditë”, ka deklaruar Kurti.
Megjithatë, ai ka nënvizuar se për paqe të plotë nevojitet drejtësia, duke shtuar se pa drejtësi “plagët mbeten të hapura”.
Read more (shqiptar):Milo: LVV duhej të bënte kompromis për zgjedhjen e presidentit, s’ka garanci as pas zgjedhjeve
Kurti ka bërë të ditur se Qeveria e Republikës së Kosovës ka forcuar kapacitetet për hetim dhe ndjekje penale, ndërsa i ka bërë thirrje Prokurorisë së Shtetit, në veçanti Prokurorisë Speciale, që të veprojë pa vonesë mbi bazën e dëshmive ekzistuese, në mënyrë që përgjegjësit të dalin para drejtësisë, “qoftë edhe në mungesë”.
“E vërteta është në anën tonë, e drejtësia është rruga jonë… Përkujtimi i së kaluarës është zotimi ynë që ajo të mos përsëritet kurrë”, ka përfunduar ai, duke nderuar dëshmorët dhe martirët e kombit./Telegrafi/
