Bashkimi i Prizrenit e ka siguruar finalen e play-offit në elitën e basketbollit kosovar, pasi e eliminoi Borën të mërkurën mbrëma dhe e mbylli serinë gjysmëfinale me rezultat 3:2.
Në ndeshjen e pestë vendimtare, të zhvilluar në palestrën “Sezai Surroi”, prizrenasit triumfuan bindshëm 100:76, duke bërë që në finale të takohet me Trepçën – një përballje që përsëritet edhe këtë edicion, ashtu si sezonin e kaluar.
Seria ishte e fortë dhe e baraspeshuar: ndeshja e parë në Prizren përfundoi 73:70 për Bashkimin, ndërsa Bora barazoi në duelin e dytë në Prishtinë me fitore 76:75.
Read more:Aksident trafiku në Prizren, katër të lënduar
Bashkimi u rikthye me fitore 88:73 në Prizren, por Bora e çoi serinë në ndeshje vendimtare pasi fitoi përballjen e katërt 104:99.
Megjithatë, në duelin e pestë, me përkrahjen e madhe të tifozëve, Bashkimi e ngriti nivelin sidomos në çerekun e tretë, ku nisi edhe shkëputja vendimtare në rezultat.
Bora e fitoi periodën e parë 23:19, Bashkimi e mori të dytën 28:21 dhe më pas ishte edhe më i thellë në të tretën, 28:19, ndërsa në periudhën e fundit e ruajti epërsinë e krijuar deri te fitorja e madhe.
Read more:Mashtrimet dhe keqpërdorimet e llogarive bankare, policia apelon për kujdes
Te Bashkimi u dalluan Lejson Zeqiri me 23 pikë, gjashtë kërcime e dy asistime, Shannon Shorter me 20 pikë, tetë kërcime e gjashtë asistime, si dhe Ike Nwamu me 21 pikë, pesë asistime e dy kërcime.
Te Bora më i miri ishte Tyler Cheese me 21 pikë, shtatë kërcime e katër asistime, ndërsa Rron Ukaj shtoi 15 pikë e pesë kërcime, por nuk mjaftuan për ta shmangur humbjen dhe eliminimin.
Read more:Atletico Madridi i Diego Simeones, “miliarder” në Ligën e Kampionëve
Finalet do të luhen me sistemin deri në katër fitore, ndërsa seria finale nis të dielën në palestrën “Minatori” në Mitrovicë nga ora 19:30, ku Trepça do ta ketë përparësisë e terrenit vendas pasi e përfundoi stinorin e rregullt në pozitën e parë, kurse Bashkimi në të dytën.
Trepça në gjysmëfinale e eliminoi Pejën me 3:1 në seri, ndërsa Bora pasi befasoi Prishtinën në çerekfinale, u ndal nga Bashkimi, nënkampioni i Kosovës. /Telegrafi/
