Presidenti i SHBA-së, Donald Trump, deklaroi se armëpushimi me Iranin vazhdon të mbetet në fuqi, edhe pse në Ngushticën e Hormuzit pati përplasje mes forcave iraniane dhe anijeve luftarake amerikane.
Sipas ushtrisë amerikane, Irani sulmoi tre shkatërrues të marinës amerikane me raketa, dronë dhe mjete të vogla detare, në atë që Uashingtoni e cilësoi si “sulm të paprovokuar”. Trump reagoi menjëherë duke thënë se “Irani u përpoq të luante me ne sot”.
Nga ana tjetër, komanda e lartë ushtarake iraniane pretendoi se SHBA kishte goditur një tanker iranian nafte dhe kishte kryer sulme ajrore në disa zona bregdetare pranë Ngushticës së Hormuzit.
Teherani tha se sulmet amerikane prekën Bandar Khamir, Sirik dhe ishullin Qeshm, ndërsa shtoi se forcat iraniane iu kundërpërgjigjën menjëherë duke shkaktuar “dëme të konsiderueshme” ndaj anijeve amerikane.
Komanda Qendrore e SHBA-së, Centcom, deklaroi se forcat amerikane “neutralizuan kërcënimet” dhe goditën objektiva ushtarake iraniane, përfshirë baza raketash dhe dronësh, si edhe qendra komanduese dhe zbulimi. “Centcom nuk kërkon përshkallëzim, por mbetet i gatshëm për të mbrojtur forcat amerikane”, thuhet në deklaratë.
Në një postim në Truth Social, Trump tha se SHBA kishte shkatërruar disa mjete të vogla iraniane dhe paralajmëroi Teheranin që të pranojë marrëveshjen e paqes. “Nëse nuk e nënshkruajnë marrëveshjen shpejt, do të goditen shumë më fort në të ardhmen”, shkroi ai.
Read more:Arabia Saudite dhe Kuvajti hapin bazat për SHBA-në, rikthehet operacioni në Ngushticën e Hormuzit
Ndërkohë, tensionet janë rritur edhe më tej pas raportimeve për sulme me raketa dhe dronë ndaj Emirateve të Bashkuara Arabe. Ministria e Mbrojtjes e Emirateve deklaroi se mbrojtja ajrore ishte angazhuar për të zmbrapsur sulmet iraniane.
Pavarësisht situatës së tensionuar, SHBA dhe Irani vazhdojnë sinjalet për negociata. Mediat amerikane raportuan se Uashingtoni po punon për një memorandum mirëkuptimi me 14 pika, që synon të hapë rrugën për negociata më të detajuara bërthamore.
Megjithatë, zyrtarë iranianë e kanë kundërshtuar propozimin amerikan. Zëdhënësi i komisionit të sigurisë kombëtare në parlamentin iranian, Ebrahim Rezaei, deklaroi se Irani “e ka gishtin te këmbëza” dhe paralajmëroi për një përgjigje të ashpër nëse SHBA nuk tërhiqet.
Edhe më herët, Trump kishte paralajmëruar se nëse nuk arrihet marrëveshje, “bombardimet do të rifillojnë me intensitet shumë më të lartë”. Programi bërthamor iranian mbetet pika kryesore e përplasjes mes dy vendeve, ndërsa situata në rajon vijon të mbetet shumë e tensionuar.
