SARANDË– Mbrëmjen e 7 majit, Saranda u trondit nga vrasja e biznesmenit Rexhep Ismaili, njëherësh veprimtar i çështjes çame dhe eksponent i PD-së. Dyshohet se autori i krimit është Lulzim Tabaku, i identifikuar nga policia direkt pas ngjarjes, por ende në arrati.
Një prej bashkëpunëtorëve të Lulzim Tabakut, 31-vjeçari Kostandin Vogli, është shoqëruar për në polici sot. Vogli është dërguar në spital për mjekim pasi ka mbetur i plagosur nga të shtënat në këmbë. Kostandin Vogli dyshohet të ketë qenë personi që kishte konflikt me 50-vjeçarin Tori Ruci. Hetuesit dyshojnë se pas përplasjes ai ka thirrur disa miq të tij, pasi kishte konstatuar praninë e Rucit në lokalin e Rexhep Ismaili në Gjashtë. Raportohet se disa persona janë shoqëruar në komisariat. Policia gjithashtu ka sekuestruar dhe 3 automjete.
Lulzim Tabaku, Idriz Çela, Eljo Muço, Kostandin Vogli, Marjo Agalliu, Ermal Shkalla, janë personat që kanë shkruar në lokalin në pronësi të Ismailit, për tu konfliktuar me Viktor Ruçin.
Burime nga grupi hetimor thanë për Report TV se, rreth orës 21:30, mbërriti një grup prej 6 personash, pasi kishin informacion se te karburanti dhe lokali i vëllezërve Ismaili ndodhej 50-vjeçari Viktor Ruçi, me origjinë nga Tepelena dhe banues në fshatin Gjashtë.
Një prej të rinjve të përfshirë në krim kishte mosmarrëveshje me Ruçin për çështje pronësie, lidhur me një lokal në zonën e bregdetit, dhe madje ishte konfliktuar më herët me të.
Për këtë arsye, kishte thirrur në ndihmë shokët dhe së bashku shkuan te lokali, ku gjetën të ulur në tavolinë Ruçin, Ismailin dhe 3 persona të tjerë, të afërm familjarë dhe shoqërorë të tyre.
Bazuar në këqyrjen e kamerave të sigurisë dhe dëshmitë e administruara nga grupi hetimor, bëhet e ditur se fillimisht ka nisur debat verbal e më pas fizik me sende të forta mes palëve, duke pasur si objektiv kryesor pikërisht Tori Ruçin.
Në sherr e sipër, 66-vjeçari Rexhep Ismaili është futur brenda lokalit dhe ka dalë me “Kallashnikov”, duke hapur zjarr disa herë ndaj grupit të të rinjve. Ndërsa autori i dyshuar, Lulzim Tabaku, e ka qëlluar me pistoletë me plumb në kokë Ismailin. Gjurmët e masakrës janë të dukshme në vendin e krimit, si gurë, shishe, atlete, xhama të thyer, karrige dhe tavolina të dëmtuara.
Pas ngjarjes, autorët janë larguar me shpejtësi nga vendi i krimit. Policia ka ngritur pika kontrolli në të gjitha hyrje-daljet e Sarandës, përfshirë edhe zonën e Qafë-Gjashtës, ndërsa kontrollet janë shtrirë edhe në spitale dhe klinika private, për identifikimin e personit të plagosur.
Vrasja e Rexhep Ismailit ka shkaktuar reagime të forta në politikë. Deputeti i PS-së Ardit Bido e ka cilësuar ngjarjen “të kobshme”, duke theksuar se Ismaili drejtonte shoqatën “Çamëria” në Sarandë dhe ishte një zë i fortë në mbrojtje të kauzës shqiptare. Edhe deputetja e PD-së Ina Zhupa është shprehur e tronditur, duke theksuar se demokratët humbën një figurë të rëndësishme, pjesë e strukturave të PD-së.
Një prej mjeteve të autorëve që mbeti në vendngjarje
Lajmi në përditësim…
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
Vrasja në Sarandë/ Miku i biznesmenit në konflikt me 6 persona, shpallen në kërkim! Gjendet në Nivicë motori me të cilin u largua autori
Drejtori i Policisë së Vlorës Elidon Çela ka dalë sot me një deklaratë publike ku ka informuar për zbardhjen e vrasjes së biznesmenit Rexhep Ismaili në lokalin në pronësi të tij në fshatin Gjashtë në Sarandë.
Deklarata e plotë e drejtorit të policisë Vlorë
Jam sot këtu për të informuar opinionin publik lidhur me veprimet e shpejta, intensive dhe profesionale hetimore, të kryera nga specialistët e Seksionit për Hetimin e Krimeve ndaj Personit dhe Specialistët për Hetimin e Krimit në Komisariatin e Policisë Sarandë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, me qëllim zbardhjen e autorësisë dhe rrethanave të ngjarjes së ndodhur rreth orës 21:30 të datës 07.05.2026.
Ngjarja ka ndodhur në kryqëzimin e fshatit Gjashtë, në ambientet e lokalit në pronësi të shtetasit R. I., (Rexhep Ismaili) ku mbeti i vrarë me armë zjarri shtetasi R. I., 66 vjeç, si dhe u plagos shtetasi K.V. (Kostandin Vogli).
Si rezultat i veprimeve hetimore, u bë i mundur identifikimi i autorit të dyshuar të vrasjes si dhe zbardhja e dinamikës së ngjarjes.
Gjithashtu, vetëm pak momente më parë është bërë dhe shoqërimi i shtetasit të plagosur Kostandin Vogli i cili aktualisht po merr ndihmën mjekësore dhe ndodhet jashtë rrezikut për jetën. Në vijim ky shtetas do t’u nënshtrohet procedurave penale.
Nga hetimet rezultoi se mbrëmjen e djeshme, shtetasit:
L.T., Lulzim Tabaku
I.C., Idriz Çela
E.M., Eljo Muço
K.V., Kostandin Vogli
M.A Marjo Agalliu
dhe E.Sh.Ermal Shkalla
kanë shkuar në lokalin e viktimës dhe janë drejtuar te tavolina ku ndodheshin shtetasi Tori Ruçi i shoqëruar nga viktima dhe persona të tjerë të pranishëm duke filluar menjëherë konfliktin me sende të forta me këta shtetas.
Gjatë konfliktit të dhunshëm, rezulton se viktima R. I ka marrë një armë zjarri automatike dhe ka qëlluar në drejtim të shtetasve të përfshirë në konflikt,
Në vijim të ngjarjes, dyshohet se shtetasi L. T. ka qëlluar me armë zjarri pistoletë në drejtim të shtetasit R. I., i cili për pasojë ka humbur jetën në vendngjarje.
Gjithashtu gjatë shkëmbit të zjarrit ka mbetur i plagosur në këmbë edhe shtetasi K.V.
Pas ngjarjes, të gjithë shtetasit e përfshirë në konflikt janë larguar nga vendi i ngjarjes. Ndërkohë, dyshohet se vëllai i viktimës, shtetasi H. I., ka larguar nga vendngjarja dhe fshehur armën e zjarrit automatike së bashku me një krehër me 21 fishekë, të cilat më pas u gjetën dhe u sekuestruan nga Policia, në cilësinë e provës materiale.
Gjithashtu, u sekuestruan prova të tjera materiale, konkretisht një automjet tip “Audi Q8”, dhe fishekë dhe gëzhoja të kalibrave të ndryshëm dhe sende të tjera që do t’i shërbejnë vijimit të hetimeve.
Gjatë kontrolleve të mëtejshme, në fshatin Nivicë u gjet i braktisur motomjeti, me të cilin dyshohet se është larguar nga vendngjarja autori i dyshuar, shtetasi L. T. Po ashtu, në lagjen nr. 1, Sarandë, u gjet dhe u bllokua një automjet tip “Audi”, i cili dyshohet se është përdorur nga autorët e përfshirë në ngjarje.
Në përfundim të veprimeve të para hetimore, u shpallën në kërkim shtetasit:
L. T., 37 vjeç, për veprat penale “Vrasja me dashje” dhe “Armëmbajtja pa leje”;
I. C., 40 vjeç, E. M., 19 vjeç, K. V., 31 vjeç, M. A., 22 vjeç dhe E. Sh., 21 vjeç, për veprat penale “Kanosja” dhe “Shkatërrimi i pronës”.
Si dhe u proceduar penalisht shtetasi H. I. (Hajredin Ismaili) 60 vjeç, vëllai i viktimës.
Vijojnë hetimet intensive për zbardhjen e plotë të dinamikës së ngjarjes si dhe kërkimet intensive për lokalizimin dhe kapjen e të gjithë shtetasve të shpallur në kërkim.
Në këtë kuadër, ftojmë qytetarët të bashkëpunojnë me Policinë e Shtetit, duke dhënë çdo informacion të vlefshëm për kapjen e shtetasve të shpallur në kërkim dhe për parandalimin e veprimeve të paligjshme.
Policia e Qarkut Vlorë mbetet maksimalisht e angazhuar në luftën kundër kriminalitetit dhe në garantimin e rendit dhe sigurisë për qytetarët, turistët dhe vizitorët.
Report Tv siguron foton e mikut të Rexhep Ismailit, në konflikt me autorët për çështje pronash
Report Tv ka siguruar foton e 50-vjeçarit Viktor Ruçi, personi i cili ishte në konflikt me autorët që vranë me plumb në kokë 66-vjeçarin Rexhep Ismaili. Ngjarja ndodhi mbrëmjen e djeshme në lokalin e këtij të fundit. Sipas raportimeve paraprake, Ruçi ishte në konflikt me persona të tjerë për çështje pronash.
Vrasja e 66-vjeçarit në Sarandë, vetëdorëzohet një nga të rinjtë e përfshirë në ngjarje! U plagos në këmbë me armë zjarri
Një nga të rinjtë e përfshirë në sherrin e dhunshëm në Gjashtë të Sarandë, që përfundoi tragjikisht me vrasjen e 66-vjeçarit Rexhep Ismaili, është vetëdorëzuar rreth 3 orë më parë.
Bëhet fjalë për Kostandin Vogli, 31 vjeç, banues në Shën Vasil të Himarë. Ai është transportuar drejt spitalit të Sarandë, ku ka marrë ndihmën e parë mjekësore, pasi rezultonte i plagosur me armë zjarri në këmbë.
Gjatë qëndrimit në spital, Vogli është marrë në pyetje nga prokurorja e çështjes, ndërsa pritet të transferohet drejt spitalit të Vlorë për mjekim më të specializuar, por edhe për arsye sigurie.
Sipas dyshimeve paraprake, Kostandin Vogli dyshohet të ketë qenë personi që kishte konflikt me 50-vjeçarin Tori Ruci. Hetuesit dyshojnë se pas përplasjes ai ka thirrur disa miq të tij, pasi kishte konstatuar praninë e Rucit në lokalin e Rexhep Ismaili në Gjashtë.
Vrasja e pronarit të karburantit, Bido: I kobshëm lajmi i vrasjes i drejtuesit të Shoqatës ‘Çamëria’ në Sarandë
Foto: Rexhep Ismaili dhe Ardit Bido
Deputeti i PS Ardit Bido ka reaguar për vrasjen e Rexhep Ismailit, pronari i një karburanti në Sarandë dhe njëkohësisht edhe kryetar i Shoqatës Çamëria në Sarandë.
Përmes një postimi në rrjetet sociale Bido thotë se lajmi i vrajses së tij ishte i kobshëm teksa thekson se Policia duhet të zbardhë sa më shpejt këtë çështje.
“I kobshëm lajmi i vrasjes së Rexhep Ismailit. Kryefamiljar që rriti një familje të mirë, biznesmen i suksesshëm, patriot dhe drejtues i zellshëm i Shoqatës Çamëria në Sarandë.
Humbja e tij trondit jo vetëm familjen dhe miqtë, por mbarë komunitetin. I bëj thirrje Policisë së Shtetit dhe Prokurorisë që të zbardhin sa më parë këtë ngjarje të rëndë dhe autorët të përballen me drejtësinë.
Ngushëllimet më të sinqerta familjes, të afërmve dhe gjithë atyre që e njohën.
Lamtumirë Rexhep!”, shkruan Ardit Bido në rrjetet sociale.
Vrasja e pronarit të karburantit në Sarandë, Zhupa: PD humbi një bashkëpunëtor të vyer
Foto: Ina Zhupa dhe Rexhep Ismaili
Deputetja e PD, Ina Zhupa shprehet e tronditur për vrasjen e Ismail Rexhepit, ndërsa thotë se PD humbi një drejtues të strukturave të saj, një kontributor të palodhur dhe një bashkëpunëtor të vyer.
Postimi i plotë:
E tronditur thellë nga lajmi për vrasjen e Rexhep Ismailit. Një njeri me vlera dhe një patriot i përkushtuar.
Partia Demokratike humbi një drejtues të strukturave të saj, një kontributor të palodhur dhe një bashkëpunëtor të vyer. Rexhepi drejtonte gjithashtu shoqatën “Çamëria” dhe ishte një zë i fortë në mbrojtje të kauzave kombëtare.
Kjo ngjarje e rëndë ka sjellë dhimbje dhe tronditje te të gjithë ne që e njohëm.
Pres që institucionet ligjzbatuese, Policia e Shtetit dhe Prokuroria, të veprojnë me përgjegjësi të plotë për zbardhjen sa më të shpejtë të kësaj vrasjeje dhe vendosjen e autorëve përpara drejtësisë.
Ngushëllimet më të sinqerta familjes, të afërmve dhe gjithë atyre që e njohën dhe e vlerësuan Rexhep Ismailin.
U prehtë në paqe.
Atentati në Sarandë/ Reagon shoqata ‘Çamëria’: Kërkojmë zbardhjen e menjëhershme të ngjarjes! Zë i palëkundur i çështjes çame
Shoqata ‘Çamëria’ ka reaguar për atentatin në Sarandë ku mbeti i vrarë kryetari i saj, Rexhep Ismaili. Në një postim në rrjetet sociale, shoqata ka dënuar ngjarjen dhe kërkon zbardhjen e saj të menjëhershme.
Gjithashtu, nënvizon kontributin e 66-vjeçarit si “zë i palëkundur” dhe “mbrojtës i pashoq” për çështjen çame.
“Me dhimbje të thellë njoftojmë ndarjen tragjike nga jeta të z. Rexhep Ismaili, Kryetar i Shoqatës ‘Çamëria’ Sarandë. Ai ishte një zë i palëkundur dhe mbrojtës i pashoq i çështjes çame që prej fillimeve të demokracisë. Shoqata ‘Çamëria’ dega Vlorë dënon këtë vrasje të rëndë dhe kërkon zbardhjen e menjëhershme të ngjarjes. Ngushëllime të sinqerta familjes dhe bashkëpunëtorëve. I paharruar qoftë kujtimi i tij!”, shkruhet në postim.
Vrasja në Sarandë/ 10 persona shkuan për të rrëmbyer një person në lokalin e tij, Ismaili ndërhyri për t’i ndalur! Mjeti i autorëve në vendngjarje
Sherri në të cilin mbeti i vrarë 66-vjeçari Rexhep Ismaili në lokalin e karburantit të tij në Sarandë, nuk e përfshinte drejtpërdrejt viktimën.
Sipas burimeve, gjatë mbrëmjes të së enjtes në lokal kanë shkuar të paktën 10 persona që kanë patur konflikt me dikë që ka qenë në lokal dhe kanë dashur ta rrëmbejnë. Dyshohet se bëhet fjalë për një konflikt pronësie.
Rexhep Ismaili u ka thënë “djali është në shtëpinë tonë dhe nuk e prekni dot këtu” dhe më pas situata ka degraduar. Në vendngjarje ka mbetur një automjet i autorëve.
